Ապրիլի 25-ին ՀՀ սփյուռքի նախարար Հրանուշ Հակոբյանն ընդունեց Ֆրանսիայի Մարսել քաղաքի «Պրովանս» օրաթերթի լրագրողներին:
Պատասխանելով նրանց հարցերին՝ Հ. Հակոբյանը կարևորեց Հայաստանում և ողջ աշխարհում Հայոց Ցեղասպանության 100-րդ տարելիցին նվիրված միջոցառումները, հատկապես՝ Հայոց Ցեղասպանության անմեղ զոհերի հիշատակին Վատիկանի Սուրբ պետրոս տաճարում մատուցված պատարագը և աշխարհի մեկ միլիարդ երկու հարյուր միլիոն կաթոլիկների հոգևոր առաջնորդի՝ Հռոմի Ֆրանցիսկոս Առաջին Պապի խոսքը:
Նախարարը նշեց, որ համաշխարհային բացառիկ նշանակություն ունեցավ հայ հանճարեղ հոգևոր գործիչ Սուրբ Գրիգոր Նարեկացին դասվեց Տիեզերական Եկեղեցու վարդապետների շարքը: Պատմական մեծ իրադարձություն էր Ցեղասպանության մեկուկես միլիոն անմեղ զոհերի սրբադասման արարողությունը Էջմիածնում:
«Քաղաքական ու պատմական մեծ հնչեղություն ստացավ Ծիծեռնակաբերդում կազմակերպված հիշատակի միջոցառումը, որին մասնակցում էին աշխարհի 50 երկրների ղեկավարներ և բարձրաստիճան պաշտոնյաներ: Որպես ժողովուրդ անսահման երախտապարտ ենք Ֆրանսիայի, Ռուսաստանի, Կիպրոսի, Սերբիայի նախագահներին, նաև նրանց, ովքեր հնարավորություն չունեին գալու, բայց հոգով և սրտով մեզ հետ էին: Այս ամենը նաև ուղերձ էր աշխարհին, որ այլևս ոչ մի տեղ ցեղասպանություն տեղի չունենա»,- ասաց նախարար Հրանուշ Հակոբյանը:
Կարդացեք նաև
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՓՅՈՒՌՔԻ ՆԱԽԱՐԱՐՈՒԹՅՈՒՆ
ՏԵՂԵԿԱՏՎՈՒԹՅԱՆ ԵՎ ՀԵՌԱՀԱՂՈՐԴԱԿՑՈՒԹՅԱՆ ՎԱՐՉՈՒԹՅՈՒՆ
