Կանադայի Խորհրդարանը միաձայնությամբ բանաձեւ որդեգրեց, ըստ որի այսուհետեւ Ապրիլ 24-ը Կանադայում հռչակվում է «Հայոց Ցեղասպանության Հիշատակի օր»: Այս մասին հայտնել է Կանադայից Հակոբ Արսլանյանը, որը Հայ Բարեգործական ընդհանուր միության Կանադայի գործադիր վարչության անդամ է:
Նրա ներկայացմամբ` «Սույն աշխատանքը արդյունքն է Հայկական Ցեղասպանության Կանադայի Կենտրոնական Մարմնի, բանաձեւը ներկայացնող պատգամավոր Բրադ Բաթը Կանադայի իշխող պահպանողական կուսակցության անունից խոսել է Ապրիլի 24-ը Ցեղասպանության Հիշատակի օր հռչակելու մասին, մասնավորաբար ավելացնելով` այսօր հարգանքի տուրք ենք մատուցում 1,5 միլիոն նահատակներին, ովքեր զոհվեցին Ցեղասպանության որպես հետևանք: Երեկ, Հայ Եկեղեցու հոգևոր կենտրոն Սուրբ Էջմիածնում տեղի ունեցավ Սրբադասման արարողություն Հայ Եկեղեցու կանոնների համաձայն: Հետևաբար, Հայոց Ցեղասպանության նահատակները սուրբեր են»:
Արձագանքելով Կանադայի քաղաքական կյանքում այս կարեւոր իրագործումին Հակոբ Արսլանյանն ասել է. «Կանադան եւս մեկ անգամ վերահաստատեց իր հանձնառությունը միջազգային քաղաքական շրջանակներում որպես ջատագով եւ պաշտպան մարդկային իրավունքների: Հանուն արդարության կատարված Կանադայի այս որոշումը շատ մեծ պատասխան է ուղղված Թուրքիային՝ նրա պետական ժխտողականության քաղաքականության»:
