«Ժառանգության» առաջնորդ Րաֆֆի Հովհաննիսյանին չեն գոհացնում այն աշխատանքները, որոնք մեր երկրի իշխանությունները կատարել եւ կատարում են 1915 թվականին տեղի ունեցած հայերի ցեղասպանությունը աշխարհում ներկայացնելու եւ ճանաչելու համար: «Ժառանգության» առաջնորդն այսօր այսպիսի կարծիք հայտնեց Ցեղասպանության զոհերի հուշահամալիր այցելության ժամանակ:
«100 տարվա տառապանքի, հայրենազրկման, 50 տարվա պայքարի արդյունքում, այսօր որոշ միջազգային տեղաշարժ` մեկն իր շահից ելնելով, մյուսը` համամարդկային ներուժով կա:
Մենք պետք է ունենանք իրավական ժողովրդավարական, ամուր պետություն, որը հիմա չունենք: Մենք պետք է ունենանք արեւմտահայոց ժառանգորդների կազմակերպած արշավներ եւ աշխատանքներ տանենք, որ կարողանանք մեր հայրենիքը վերականգնել: Բազմիցս ասվել է, որ այն ինչ տեղի ունեցավ 100 տարի առաջ սոսկ ցեղասպանություն չէ, այլ` հայրենասպանություն, դա հայրենիքի մի ողջ քաղաքակրթության, մշակույթի ոչնչացում էր»
Հարցին, թե ԱՄՆ նախագահ Բարաք Օբաման այս տարի էլ խուսափեց «ցեղասպանություն» բառից, Րաֆֆի Հովհաննիսյանն ասաց, որ ինքն ամեն տարի այս օրը հիշում է իր պապիկներին, տատիկներին` փորձում նրանց հետ առերեսվել, խոսել, թե իր կյանքի ընթացքում ինչ է արել, որ «կորուսյալ հայրենիքը» հետ բերի:
Կարդացեք նաև
«Հաստատ, Բարաք Օբաման կամ որեւիցե այլ ղեկավար մեր հայրենիքը հետ չի բերելու: Ցեղասպանության եզրույթի օգտագործումը Օբամայի կողմից, ոչ թե լավություն է հայ ժողովրդին, այլ ամերիկյան պատմության ինտեգրալության մասին ապացույց կլիներ, որ հենց ամերիկացիներն են իրենց դեսպաններով, հյուպատոսներով, միսիոներներով 100 հազարավոր փաստաթղթերով, որոնք ապացուցեցին, հաստատեցին, որ տեղի է ունենում աննախադեպ ոճրագործություն: Եվ դրա համար, Օբաման կամ որեւէ այլ երկրի ղեկավար չի ուզում իր սեփական պատմությունը հարգել սեփական պատմագրության ինտեգրալությունը պաշտպանել` դա իրենց խնդիրն է»:
Լուսինե ԲՈՒԴԱՂՅԱՆ
