Այսօր՝ ապրիլի 24-ին Հայոց ցեղասպանության 100-րդ տարելիցին նվիրված հիշատակի միջոցառումների առիթով Հայաստան ժամանած Սերբիայի Հանրապետության նախագահ Տոմիսլավ Նիկոլիչն իր ելույթում «հրեշավոր ցեղասպանություն» որակեց 1915-ին հայ ժողովրդի հետ կատարվածը: « Ինչպե՞ս կարող ենք դավաճանել միլիոնավոր զոհերի հիշատակը, ինչպե՞ս չսովորենք այն դասերը, որ մարդկությունը ավանդել է վաղուց: Մեզ համար Հայաստան չգալու տարբերակ չկար մենք չէինք կարող այստեղ չլինել: Մենք պետք է լինենք աշխարհի քաղաքացիներ,»,-իր ելույթում նշեց Սերբիայի նախագահը: Նա կրկնեց իրենց պատրիարքի խոսքերը. «Եկե՛ք մարդ լինենք»:
Ֆրանսիայի Հանրապետության նախագահ Ֆրանսու Օլանդն էլ իր ելույթում նշեց, որ Ֆրանսիան տարբերակում չի դնում ողբերգությունների միջեւ, լինի դա Հայոց ցեղասպանություն, հրեաների Հոլոքոստը, Ռուանդայի ցեղասպանությունը, թե ընդհանարապես բոլոր ոճիրները: «Այս պահին, երբ ես խոսում եմ, Մերձավոր Արեւելքում ծրագրված, համակարգված ոճրագործություն է գնում, մահմեդականները եւս զոհ են, քրիստոնյա սիրիահայերը, բոլոր փոքրամասնությունները վտանգված են մարդկության դեմ գործած հանցագործության պատճառով»: Նախագահ Օլանդը նշեց, որ Ֆրանսիան դասեր չի տալիս, բայց գիտի, թե ինչ է պատմության պարտավորությունը:
Անդրադառնալով Հայոց ցեղասպանությանն ու 100-րդ տարելիցին, նա ասաց, որ Հայոց ցեղասպանության հարյուրամյակը կոչ է հաշտեցման, խաղաղության. «Թուրքիայում կարեւոր բառեր կան, որոնք հնչել են, բայց կան նաեւ այլ կարեւոր բառեր, որոնք դեռ պետք է հնչեն՝ մեղմացնելու համար ցավը»:
Նա հիշեց Հրանտ Դինքին, Ցեղասպանության բոլոր զոհերին, հայտարարեց, որ Ֆրանսիայում ապրող բոլոր հայերը նույնքան Ֆրանսիացի են, որքան եւ հայ: Իսկ Շարլ Ազնավուրը, նրա ձեւակերպմամբ, մեր ընդհանուր հպարտությունն է:
Կարդացեք նաև
Իր ելույթի վերջում Ֆրանսիայի նախագահը շեշտեց. «Երեւանի ուղերձն է խաղաղություն բոլորին, վերապրողների հիշողությանը, Հայոց ցեղասպանության ճանաչումը խաղաղության ակտ է… Ամենակարեւոր իրավունքներից մեկը հիշողության իրավունքն է»:
Գոհար ՀԱԿՈԲՅԱՆ
