Հայոց ցեղասպանության 100-ամյա տարելիցին նվիրված հիշատակի միջոցառումներին Հայաստան են ժամանել ավելի քան 60 երկրների պատվիրակություններ եւ 4 երկների նախագահներ՝ Ռուսաստանի, Ֆրանսիայի, Կիպրոսի ու Սերբիայի:
Կիպրոսը երրորդ երկիրն է, որ ճանաչել է հայոց ցեղասպանությունը: Սերբիայի նախագահն արդեն երկրորդ անգամ է այցելում Հայաստանի Հանրապետություն; Ավելի վաղ նա արծաթափայլ եղեւնի էր տնկել Հիշողության պուրակում:
ԱՄՆ-ը ներկայացնում է ֆինանսների նախարար Ջեյքոբ Լյուին, ԱՄԷ-ն առողջապահության նախարար Աբդուլ Ռահման Օվեյսը, Կանադան՝ քաղաքացիության եւ ներգաղթի նախարար Քրիս Ալեքսանդրը: Մեր հարեւան Վրաստանից 100-ամյա տարելիցին նվիրված հիշատակի միջոցառումների առիթով Հայաստան է ժամանել Վրաստանի նախագահի խորհրդարանի նախագահի տեղակալ Մանանա Կոբախիձեն:
Ինչ վերաբերում է ԵՄ խորհրդարանին, Հայաստան է ժամանել փոխնախագահ Ռիչարդ Չառնեցկին, Երեւանում է նաեւ ԵԺԿ նախագահ Ժոզեֆ Դոլը:
Ֆրանսիայի նախագահ Ֆրանսուա Օլանդը եւ ՌԴ նախագահ Վլադիմիր Պուտինը եւս Ծիծեռնակաբերդում են, նրանք նաեւ իրենց գրառումն են կատարել Ցեղասպանության թանգարանի հուշամատյանում:
Հավելենք, որ 21 պետություն արդեն պաշտոնապես ճանաչել է Հայոց ցեղասպանությունը:
Գոհար ՀԱԿՈԲՅԱՆ
Լուսանկարը՝ արխիվային. Երիտասարդական խորհրդարանը Ծիծեռնակաբերդի հուշահամալիրում կազմակերպել էր աղավնիների ճախրանք` ի նշան խաղաղության և ամբողջ աշխարհում ցեղասպանությունների ու բռնությունների դեմ երիտասարդների միավորման:
