Ինչպես արդեն տեղեկացրել ենք Եվրոպայի խորհրդի խորհրդարանական վեհաժողովում (ԵԽԽՎ) «Հայոց ցեղասպանության 100-րդ տարելիցի հիշատակում» խորագրով հայտարարություն է հրապարակվել: Այն այս պահի դրությամբ ստորագրել են ԵԽԽՎ շուրջ 170 պատվիրակներ:
ԵԽԽՎ պաշտոնական կայքում հայտարարությունը հրապարակվել է: Aravot.am-ը, ծանոթանալով հայտարարությունը ստորագրած պատվիրակների ցանկին, պարզեց, որ նրանց շարքում է նաև թուրք պատվիրակ Նազմի Գուրը:
Հայտարարության տեքստում խոսվում է ընդհանրապես ցեղասպանությունների ճանաչման և դատապարտման մասին: Մասնավորապես նշված է. «Հայոց ցեղասպանության ժամանակին և հստակ դատապարտման բացակայությունը պատճառ դարձավ մարդկության դեմ հետագայում նոր ոճրագործությունների ծնունդին, ինչպես օրինակ՝ Հոլոքոստը: Ապրիլի 24-ին լրանում է Հայոց ցեղասպանության 100-րդ տարելիցը: Ցեղասպանություն, որի ընթացքում 1.5 միլիոն հայեր ոչնչացել են Օսմանյան կայսրության կատարած ոճրագործության պատճառով»:
Հայտարարության մեջ նշվում է նաև, որ այն ստորագրած պատվիրակները հարգում են անմեղ զոհերի հիշատակը և դատապարտում մարդկության դեմ բոլոր տեսակի ոճրագործությունները:
Կարդացեք նաև
Նաև նշվում է, որ մարդկության դեմ ոճրագործությունների դատապարտումն ու կանխարգելումը պետք է լինի Վեհաժողովի առաջնահերթություններից:
Նշենք, որ հայտարարությունը բաց է երեք ամիս, այս ընթացքում հայտարարությանը կարող են միանալ ցանկացող պատվիրակները:
Տաթև ՀԱՐՈՒԹՅՈՒՆՅԱՆ
