Այսօր՝ ապրիլի 23-ին, «24.04» նվագախմբի համերգի գլխավոր փորձի ժամանակ հանդիպեցինք Երեւանի քաղաքապետի տեղակալ Արամ Սուքիասյանին, որը 100-ամյակի միջոցառումների ծրագրերի ղեկավարությունն է ստանձնել որպես ռեժիսոր:
Aravot.am-ը նրանից հետաքրքրվեց՝ վարչական աշխատանքը չի՞ խանգարում ստեղծագործականին: «Արդեն երկար ժամանակ է, որ վարչական աշխատանքը զուգորդում եմ ստեղծագործականի հետ, մեկը մյուսին իրականում սկսել է խանգարել, բայց որ պահին, որն առաջնահերթ եմ համարում, կոնկրետ փուլում ավելի շատ դրանով եմ զբաղվում»,-ասաց պարոն Սուքիասյանը:
Նա նաեւ հավելեց, որ «Վերածնունդ» խորագրով ապրիլի 24-ին կայանալիք համերգը զուգակցվելու է օրվա խորհրդին համահունչ տեսանյութերով. «Բավականին հետաքրքիր տեսանյութեր են՝ մեր վավերագրումից մինչեւ մեր օրերը: Տեսաշար է՝ 100-ամյակ, վերածնունդ , մեր ձեռքբերումներն ու անկումները, նվաճումները, հաղթանակները, պետականությունը, մի բան, որի լինելու պարագայում, չէր լինի ցեղասպանությունը»:
Արամ Սուքիասյանի ձեւակերպմամբ, այսօր ու միշտ էլ լավագույն քարոզչամիջոցն աշխարհում մնում է մշակույթը:
Կարդացեք նաև
Գոհար ՀԱԿՈԲՅԱՆ
