Ապրիլի 24-ից դեռ օրեր առաջ՝ բազմաթիվ պետական ու ոչ պետական կազմակերպությունների տարբեր կոլեկտիվներ ու ներկայացուցիչներ սկսել են այցելել Ծիծեռնակաբերդի հուշահամալիր՝ իրենց հարգանքի տուրքը մատուցելու Մեծ եղեռնի զոհերի հիշատակին։
Անմար կրակի մոտ արդեն իսկ երեկվա դրությամբ հազարավոր ծաղիկներ էին խոնարհած, հուշահամալիրում կային տասնյակ ծաղկեպսակներ, իսկ այցելուների հոսքը չէր դադարում։
Դպրոցների ամբողջ դասարաններ, բուհերի կուրսեր, ընտանիքներ՝ երեխաների հետ ու նույնիսկ առանձին մարդիկ, ծաղիկները ձեռքին հաղթահարում էին Ծիծեռնակաբերդի բարձունքը։ Ծաղկավաճառները նույնպես արդեն մի քանի օր է, ինչ աշխատում են՝ տեղ զբաղեցնելով Մարզահամերգային համալիրի մոտակա գետնանցումում։ Նրանց, ի դեպ, տարածքում հերթապահող ոստիկանները զգուշացրել են, որ ամսի 24-ին մերձակայքում վաճառք իրականացնել չի թույլատրվելու։
«ՀԺ»-ի այցելության ընթացքում Ցեղասպանության զոհերի հուշահամալիրն այնքան բազմամարդ էր, որ նրանց մեջ առաջին հայացքից չէին նկատվում «Պատվո պահակ» հերթապահություն իրականացնող դպրոցականները։ Նահատակված նախնիներին ոգեկոչելու եկածներից շատերը մտավախություն հայտնեցին, որ ապրիլի 24-ին հուշահամալիր այցելելը բարդ կլինի, որովհետեւ, ըստ նրանց, նախ օրվա մի մասը քաղաքացիների մուտքն արգելված է լինելու, իսկ հետո՝ արդեն մարդկանց մեծ կուտակումներ են կանխատեսվում։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
