Հայոց ցեղասպանության 100-րդ տարելիցի կապակցությամբ Հայաստանի ազգային պոլիտեխնիկական համալսարանում այսօր՝ ապրիլի 22-ին բացվեց ցուցահանդես, որտեղ ներկայացված էին Դիզայնի ֆակուլտետի տարբեր կուրսերի ուսանողների երկու տասնյակից ավելի աշխատանքներ: Նախաձեռնության հեղինակներին իրենց խորհուրդներով ուղղորդել եւ աջակցել էին ֆակուլտետի դասախոսները եւ դեկան Լևոն Թոքմաջյանը:
Պոլիտեխնիկի Հայոց ցեղասպանության 100-րդ տարելիցին նվիրված աշխատանքային խմբի ղեկավար Էդիկ Կյուրեղյանը շեշտեց. «Մեր ազգը նպատակաուղղված է ոչ միայն պաշտպանելու մարդկայնությունը և պատմականորեն ստիպելու, որպեսզի վերականգնվի արդարությունը, այլև արարելու, զարգանալու և իր արժանի տեղը զբաղեցնելու մարդկության համաշխարհային ընտանիքում»։
Կարդացեք նաև
Դիզայնի ֆակուլտետի ուսանողները ներկայացրեցին իրենց ստեղծագործություններ, որոնք շնչում էին լավատեսությամբ:
Համալսարանի պատվավոր հյուրն էր Միլանի Պոլիտեխնիկի Ճարտարապետության և քաղաքաշինության դեպարտամենտի պրոֆեսոր Ֆրանչեսկո Աուջելին։ Դիզայնի ֆակուլտետի հետ համատեղ իրականացվող «Erasmus Mundus» ծրագրի շրջանակներում պրոֆեսորը կանցկացնի դասընթացներ` փայտե իրերի, կահույքի ամրակցման վերաբերյալ: «Նման միջոցառումներում կարևորում եմ այն առումով, որ դրանց նախաձեռնողները երիտասարդներն են: Նրանք պետք է պահպանեն հիշողությունը ապագա սերունդների համար, գտնեն լուծումներ երկու ժողովուրդների միջև համերաշխության ջահ վառելու ուղղությամբ։ Ցանկալի կլինի, որ այսպիսի միջոցառումներ հաճախ կազմակերպվեն»,- ասաց պարոն Աուջելին։ Ռեկտորի պաշտոնակատար Հովհաննես Թոքմաջյանը շնորհակալություն հայտնեց ցուցահանդեսի կազմակերպիչներին և աշխատանքների հեղինակներին, ինչպես նաև ֆակուլտետների դեկաններին և պրոֆեսորադասախոսական անձնակազմին՝ ցուցաբերած աջակցության համար։
Ի դեպ, դիզայնի նորաբաց ֆակուլտետը այն պակասող օղակն էր Պոլիտեխնիկում, որը սերտ կապեր պետք է հաստատի այլ ֆակուլտետների հետ։ Բուհի մասնագետների համոզմամբ, այդ կապերը նոր գաղափարների, դիպլոմային և կուրսային աշխատանքների հիմք կստեղծեն գրավիչ դարձնելով ճարտարագիտական նորարարական արտադրանքը։ Ցեղասպանության 100-րդ տարելիցին նվիրված ցուցահանդեսը կգործի մինչեւ մայիսի 8-ը։
Գոհար ՀԱԿՈԲՅԱՆ
