Եվրոպայի խորհրդի խորհրդարանական վեհաժողովի (ԵԽԽՎ) գարնանային նստաշրջանի լիագումար նիստում քիչ առաջ ելույթ ունեցավ Բելգիայի արտաքին գործերի նախարար, ԵԽ նախարարների խորհրդի նախագահ Դիդիե Ռեյնդերսը: Այնուհետև հաջորդեց պատվիրակների հետ հարցուպատասխանը: Ադրբեջանի պատվիրակության անդամները կրկին բարձրացրին դիվերսիոն գործողություն իրականացրած Դիլհամ Ասկերովի եւ Շահբազ Գուլիեւի հարցը` նրանց ներկայացնելով իբրև թե գերիներ:
Պարոն Ռեյնդերսն առանձնապես կարևորություն չտվեց նշված երկու անձանց խնդրին, այլ ընդհանուր անդրադարձավ փախստականների հետ կապված հիմնախնդրին. «Ես առաջիկա շաբաթվա ընթացքում այցելելու եմ Հայաստան և Ադրբեջան, ուստի իմ ուշադրության կենտրոնում են լինելու երկու կողմերի փախստականների հետ կապված հարցերը»:
Տաթև ՀԱՐՈՒԹՅՈՒՆՅԱՆ
