Էկոնոմիկայի նախարար Կարեն Ճշմարիտյանն այսօր կառավարության նիստից հետո, անդրադառնալով տնտեսական աճի անկմանն ու առեւտրի ծավալների նվազմանը, ասաց, որ համախառն ներքին արդյունքի կամ տնտեսության ակտիվության վրա ազդեցության առումով մեկը մյուսին «կոմպենսացնում են»: Նախարարն ասաց, որ արտահանման ավելացում է եղել նաեւ ադամանդագործության ոլորտում. «Լուրջ ծավալներ է ապահովում արդեն Թեղուտի պղնձամոլիբդենային կոմբինատը, այսինքն, առանձին վերցված ոլորտային ակտիվացումները կոմպենսացնում են»:
Կարեն Ճշմարիտյանի խոսքերով, պետք չէ այս իրավիճակն անվանել ճգնաժամ: Ըստ նրա, ճիշտ է գնողունակությունն ընկել է, գների անկայունություն կա, ինչը բնական է` պայմանավորված Ռուսաստանում ստեղծված իրավիճակով, բայց նախարարը կարծում է, որ կանխատեսած 4,1 տոկոս տնտեսական աճը ուժի մեջ է եւ վերանայման հիմք չկա:
Պարոն Ճշմարիտյանը պատասխանելով Aravot.am-ի հարցին, թե այդ դեպքում ինչո՞ւ են միջազգային տնտեսական կառույցների կանխատեսումներն այդքան հոռետեսական, նախարարն ասաց, որ նրանք ունեն որոշակի մոդելներ եւ կոնկրետ ազդեցությունները գնահատում են, ոչ թե ավելի շատ իրական հատվածից ելնելով, ծրագրային կամ միջոցառումներից, այլ մեկ-երկու բաղադրիչով, որը նաեւ վերապահովագրում է իրենց որոշակի առումով:
Կարդացեք նաև
Լուսինե ԲՈՒԴԱՂՅԱՆ
