Գարունն այն ժամանակահատվածն է, երբ կարելի է սկսել բնության բարիքներից օգտվել: Այժմ հրաշալի ժամանակն է օգտագործել ծնեբեկ, որն ունի ավելի քան 200 տեսակ: Այս բույսը հանդիպում է թփուտներում, մացառուտներում, քարքարոտ լանջերին: Այս բույսից ոչ միայն համեղ կերակրատեսակ են պատրաստում, այլեւ օգտագործում են որպես դեղաբույս: Բուժական նպատակով օգտագործվում են բույսի արմատը, կոճղարմատը եւ մատղաշ ընձյուղները, որոնք պարունակում են միկրոտարրեր` ցինկ, կալիում, կալցիում, նատրիում, մագնեզիում, ֆոսֆոր, երկաթ, վիտամիններ` B1, B2, B9, C, E, A, PP, կարոտին, գլիկոզիդներ, կումարին, վանիլին, ֆիլիդոնաթթու: Հարուստ է սպիտակուցներով եւ ճարպաթթուներով:
Պրովիտամին A (բետա-կարոտին)՝ դրական ազդեցություն տեսողության համար, բարելավում է նաեւ մաշկի վիճակը: Շնորհիվ կալցիումի եւ ֆոսֆորի, ծնեբեկը օգտակար է ոսկրային հյուսվածքների համար: Ծնեբեկն ունի հանգստացնող ազդեցություն՝ շնորհիվ իր մեջ պարունակող մագնեզիումի: Պարունակում է նաեւ յոդ, որը հատկապես օգտակար է կանանց համար:
Վիտամին PP` նիկոտինաթթուն օգտակար է աթերոսկրելոզի, հեպատիտի, լյարդի ցիռոզ հիվանդության կանխարգելման եւ բուժման համար: Կանանց հղիության եւ կրծքով կերակրելու` լակտացիոն շրջանում. թուլացնում է արյան անոթները, իջեցնում արյան ճնշումը, բարելավում է արյան շրջանառությունը: Շնորհիվ մեծ քանակությամբ ֆոլաթթվի (վիտամին B9), հղի կանանց առավել եւս խորհուրդ է տրվում օգտագործել ծնեբեկ:
Այս բույսն ունի միզամուղ, զարկերակային ճնշումն իջեցնող հատկություն, սրտի աշխատանքը կարգավորող, հանգստաբեր ազդեցություն: Կիրառվում է ջրգողության, ցիստիտների, երիկամային հիվանդության, շագանակագեղձի բորբոքման բուժման ժամանակ:
Ծնեբեկը օգտագործվում է որպես կոսմետիկ միջոց, այս բույսի հիմքով պատրաստված դիմակները մաքրում եւ փափկեցնում են մաշկը:
Կարդացեք նաև
Ծնեբեկը հակացուցվում է ստամոքսի եւ 12-մատյա աղիքի խոցի դեպքում:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
21.03.2015
