Գերմանիայի Ուբեռլինգեն քաղաքի պատկերասրահում հաջորդ տարվա հունիսին հայ ժամանակակից արվեստի գործերի ցուցադրություն է լինելու: Այն կազմակերպվել է «Մշակույթների երկխոսություն» հիմնադրամի նախաձեռնությամբ ու նվիրված է Հայոց ցեղասպանության 100 ամյակին:
«Սա մտածված ընտրություն էր՝ հենց 2016 թվականը, որովհետեւ այս տարի բազմաթիվ ցուցահանդեսներ ու միջոցառումներ կան եւ որ հետաքրքրությունը, սպասումների ալիքը չմարի, փորձեցինք հաջորդ տարի տեղափոխել ցուցադրությունը: Որ ազդարարենք` միայն 100 ամյակին չէ, որ հայկական հարցը արդիական է, այլ յուրաքանչյուր ամիս»,- այսօր «Մեդիա» կենտրոնում ասաց հիմնադրամի նախագահ Սոնա Հարությունյանը:
Ըստ նրա, ցուցահանդեսին կմասնակցեն ժամանակակից արվեստի ձեւավորման գործում ներդրում ունեցած արվեստագետները: Կներկայացվեն
Վազգեն Բաժբեուկ- Մելիքյանի, Կամո Նիգարյանի, Նարեկ Ավետիսյանի, Օվսաննա Շեկոյանի, Վահան Ռումելյանի գործերը, իսկ Գագիկ Հարությունյանն էլ ցուցահանդեսին իր լուսանկարչական գործերն է ներկայացնելու:
Կարդացեք նաև
Նրա խոսքով, հիմնադրամը մարտին Գերմանիա է գործուղել հայ նկարիչ Տիգրան Կիրակոսյանին, նա այնտեղ մինչեւ մայիսի 10-ը աշխատելու է գերմանական գեղարվեստի ակադեմիայի արվեստանոցներում ու Հայոց ցեղասպանության 100 ամյակին նվիրված ցուցահանդես է ունենալու մայիսի 11-ին եւ «Ձայն անցյալից խորագրով» 20 գործ է ցուցադրելու:
Արփինե ՍԻՄՈՆՅԱՆ
Լուսանկարը՝ «Մեդիա» կենտրոնի
