Այսօր՝ ապրիլի 21-ին, ԳԱԱ Գիտակրթական միջազգային կենտրոնի ուսանողությունը նախաձեռնել էր երթ դեպի Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպանատուն: Նպատակը հայ ուսանողության բողոքի ու Հայոց ցեղասպանության ճանաչմանն ու ընդունմանն ուղղված պահանջատիրության արտահայտումն էր:
Մասնակցում էր մոտ երկու տասնյակ ուսանող, երթը խաղաղ բնույթ ուներ՝ առանց վանկարկումների, ուսանողերի ձեռքին հայոց եռագույնն էր եւ իրենց պահանջատիրությունը ներկայացնող պաստառներ: Երթը կազմակերպողների ձեռքին՝ նամակն էր, որտեղ ներկայացված էին պահանջը եւ պահանջին միացած ուսանողների ստորագրությունները:
Հասնելով դեսպանատան մոտ՝ երթի մասնակիցները զրուցեցին անվտանգության աշխատակիցների հետ, որից հետո կապ հաստատեցին դեսպանատան աշխատակիցներից մեկի հետ՝ ներկայացնելով իրենց ցանկությունը՝ փոխանցել նամակը դեսպանին:
Կարդացեք նաև
Մանրամասները՝ տեսանյութում
Երթը նախաձեռնողներից ԳԱԱ գիտակրթական միջազգային կենտրոնի ուսանողների հետ տարվող աշխատանքների համակարգող-մասնագետ Ազնիվ Շահազիզյանը Aravot.am-ի հետ զրույցում ասաց, որ ԳԱԱ-ի ուսանողների նախաձեռնած այս միջոցառումը շարունակական բնույթ է ունենալու, մտադրվել էին այցելել բոլոր այն պետությունների դեսպանատներ, որոնք չեն ընդունել Հայոց ցեղասպանությունը, որոշեցին նախ սկսել Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպանատնից, իր խոսքով ասած, որովհետեւ գերտերություն է:
Հետո նաեւ նշեց, որ Բրիտանիայի վարած քաղաքականությունն էլ տարբերվող է, Թուրքիայի հետ առանձնահատուկ հարաբերություններ ունի:
«Ուզում եմ նշել, որ սա խնդրանք չէր, այլ պահանջ»,- ասաց Ազնիվ Շահնազարյանը:
Մանրամասները՝ տեսանյութում
Հռիփսիմե ՀՈՎՀԱՆՆԻՍՅԱՆ
