Տավուշի մարզի Նորաշեն գյուղի բնակիչ, 1992թ. ծնված Արման Խանաղյանին մեղադրանք է առաջադրվել այն բանի համար, որ նա հանդիսանալով ՀՀ ՊՆ զորամասերից մեկի բաղնիքի պետ, պայմանագրային զինծառայող, կոչումով շարքային, 2015թ. հունվարի 23-ին, ժամը 12.30-ի սահմաններում նույն զորամասի լվացքատանը,ստորադասության հարաբերությունների բացակայության պայմաններում խախտել է ՀՀ ԶՈՒ ներքին ծառայության կանոնագրքի 13 եւ 65 հոդվածներով նախատեսված զինծառայողների փոխհարաբերությունների կանոնագրքային պահանջները, չնչին առիթով՝ սպիտակեղենը հանձնելու հարցի շուրջ վիճաբանել է նույն զորամասի ժամկետային զինծառայող, կրտսեր սերժանտ Գ. Մ.-ի հետ, որի ընթացքում բռնություն է գործադրել վերջինիս նկատմամբ՝ բռունցքով հարվածել է նրա ձախ հոնքին՝ առողջությանը պատճառելով թեթեւ ծանրության վնաս:
Ըստ «Դատալեքս» դատական տեղեկատվական համակարգի՝ Ա. Խանաղյանին մեղադրանք է առաջադրվել ՀՀ քրեական օրենսգրքի 359 հոդվածի 2-րդ մասի 4-րդ կետով: Նրա նկատմամբ խափանման միջոց է ընտրվել չհեռանալու մասին ստորագրությունը: Սույն քրեական գործով դատավարությունն այսօր մեկնարկում է Տավուշի մարզի առաջին ատյանի դատարանի Բերդի նստավայրում:
Ոսկան ՍԱՐԳՍՅԱՆ
