Վերաքննիչ դատարանում մարտի 20-ին դատավոր Տեր-Ադամյանի նախագահությամբ քննվում էր Հիմնադիր խորհրդարանի անդամ Ժիրայր Սեֆիլյանի խափանման միջոցի մասին առաջին ատյանի դատարանի կայացրած որոշումը:
Դատական նիստից հետո փաստաբան Արա Զաքարյանը լրագրողներին տեղեկացրեց, որ դատարանը մերժել է իրենց բողոքը. «Հերթական անգամ դատարանը ցույց տվեց, որ ինքը ոչ թե իրականացնում է երրորդ իշխանությունը, այլ ցավոք սրտի, նմանատիպ գործերով ուղղակի իշխանության պատվերն է իրականացնում: Վերաքննիչ դատարանը բառացիորեն կրկնեց առաջին ատյանի դատարանի որոշումը՝ նշելով, որ այնուամենայնիվ, օրինական է, հիմնավորված է, հետեւապես՝ բողոքը պետք է մերժել»:
Փաստաբանը համարում է, որ դատարանները քրեական գործի հարցում չունեն բավարար անկախություն՝ արդարադատություն իրականացնելու համար. «Դա առավել եւս ցայտուն երեւում է կալանքի հետ կապված հարցերով: Ինչ վերաբերում է այն գործերին, որոնք որ քաղաքական հնչեղություն ունեն, եւ անձանց նկատմամբ քաղաքական հետապնդում է իրականացվում իրենց քաղաքական հայացքների համար, ապա նմանատիպ գործերով, ցավոք սրտի, դատարանները նախաքննական մարմինների որոշումների վրա իրենց կնիքն են դնում՝ օրինականացնելու համար այդ որոշումները»:
Այսօր Վարչական դատարանը քննելու է նաեւ Հիմնադիր խորհրդարանի մյուս անդամների՝ Արամ Հակոբյանի, Գեւորգ Սաֆարյանի, Գարեգին Չուգասզյանի, Պավել Մանուկյանի գործերը: Այս պահին դատավոր Տեր-Ադամյանի նախագահությամբ քննվում է Արամ Հակոբյանի գործը:
Կարդացեք նաև
Մանրամասները՝ շուտով տեսանյութում:
Ամի ՉԻՉԱԿՅԱՆ
