Վաղն ԱԺ արտահերթ նիստում կքննարկվի հայոց ցեղասպանության 100-րդ տարելիցի մասին ԱԺ հայտարարության նախագիծը:
ԱԺ ԲՀԿ խմբակցության քարտուղար Վահե Էնֆիաջյանն այսօր «Պոստ սկրիպտում» ակումբում կարծիք հայտնեց, որ վաղն այն միաձայն է ընդունվելու.
«Որտեղ, մասնավորապես կարեւորվել է բոլոր խորհրդարանների, պետական կառույցների վերաբերմունքն ու գնահատականը այդ ոճրագործությանը, միաժամանակ պարունակում է կոչ բոլոր խորհրդարաններին, որ նմանատիպ նախաձեռնությամբ հանդես գան»:
Նրա խոսքով, ԱԺ-ն արդեն 80 հրավերք է ուղղել տարբեր երկրների խորհրդարանների ղեկավարներին, որ ներկայացուցչական կազմով ապրիլի 24-ին գան Հայաստան՝ մասնակցելու ցեղասպանության տարելիցին նվիրված միջոցառումներին ու արդեն 32 երկրներից իրենց հրավերքը հաստատվել է:
Կարդացեք նաև
Նա ասաց, որ ԱԺ հայտարարությունից հետո սպասելիքներ կան, որ տարբեր երկրների խորհրդարաններ հայոց ցեղասպանությունը դատապարտող հայտարարություններ կընդունեն:
Հարցին, թե հայոց ցեղասպանությունը դատապարտող վերջին օրերին կարեւոր փաստաթղթերը իշխանությա՞ն, թե՞ ընդդիմության աշխատանքի արդյունք է համարում, պատգամավորը չցանկացավ առանձնացնել. «Չեմ ցանկանում, որ մեզնից որեւէ մեկը նայի այս հարցին՝ իշխանությա՞ն, թե ընդդիմադիր դաշտի ջանքերի արդյունք է: 100-րդ տարելիցին նվիրված հայտարարության հեղինակը, զեկուցողը եղել է Զարուհի Փոստանջյանը, հարակից զեկուցողը Արտակ Զաքարյանը: Բայց նույն հայտարարության ներքո բոլոր խմբակցությունների պատգամավորները ստորագրել են, վերախմբագրման աշխատանքներին մասնակցել են: Չեմ կարծում պետք է սա ներկուսակցական շահերի ներքո տեսնել»:
Արփինե ՍԻՄՈՆՅԱՆ
