Այսօր ընդդիմության մեջ կա՞ ուժ, որի վրա Սերժ Սարգսյանը լծակներ, ազդեցություն չունի: Aravot.am-ի այս հարցին ի պատասխան՝ ՀԱԿ խմբակցության ղեկավար Լեւոն Զուրաբյանն ասաց. «Դա կարելի է ստուգել: Ես չեմ ուզում որեւէ մեկին մեղադրել, բայց կան բաց չափանիշներ, որոնցով կարելի է ստուգել, թե ով է գտնվում նրա ազդեցության տակ, ով չի գտնվում: Իշխանությունը չի վախենում ընդդիմությունից, որն իր իշխանության համար վտանգ չի ներկայացնում: Հակառակը, ինքը ուրախ կլինի խրախուսել նման ընդդիմության գոյությունը, նրան ամբողջ հեռուստատեսությամբ շրջանառի: Տեսեք, թե ընդդիմությունից ում են շատ ցույց տալիս իշխանության վերահսկողության տակ գտնվող հեռուստատեսությամբ: Դա ուղիղ այն ընդդիմությունն է, որոնցից իրենք վախ չունեն եւ ոչ մի վտանգ չեն զգում»:
Ըստ Լեւոն Զուրաբյանի, շատ հեշտ է ընդդիմադիրներին այսօր տարանջատել. «Այսօր ամենամեծ վտանգը Սերժ Սարգսյանի համար Սահմանադրական բարեփոխումների տապալումն է, որովհետեւ դա նշանակում է, որ իր իշխանությունը չի կարող երկարաձգվել երրորդ ժամկետով: Պարզ հարց է: Սա այն հարցն է, որտեղ ստուգվում է, թե ով է վտանգ ներկայացնում Սերժ Սարգսյանին, ով՝ չէ: Հիմա ՀԱԿ-ը հայտարարել է, որ սկսելու է գործընթաց՝ այդ սահմանադրական գործընթացի դեմ եւ վերածելու է այն ըստ էության Սերժ Սարգսյանին անվստահություն հայտնելու հանրաքվեի: Ունե՞նք մենք դաշնակից այդ հարցում: Գնացեք հարցրեք այն քաղաքական ուժերին, ում վրա դուք կասկածում եք՝ նրանք ընդդիմությո՞ւն են, թե՞ չէ»:
Հռիփսիմե ՋԵԲԵՋՅԱՆ
