Մինչ Հայաստանի տնտեսության վրա բացասական ազդեցության արտաքին եւ ներքին ռիսկերը կարծես թուլանում են, միջազգային ֆինանսական կազմակերպությունների փորձագետներն ավելի հոռետես են դառնում։
Վերջին շրջանում իրար հերթ չտալով՝ նրանք նվազեցնում են Հայաստանի տնտեսական աճի կանխատեսումները։ Եթե մինչեւ վերջերս խոսվում էր թեկուզ փոքր, բայց աճի հավանականության մասին, ապա այժմ սպասումները աստիճանաբար վերանայվում են ոչ միայն նվազման, այլեւ անկման ուղղությամբ։
Որ միջազգային ֆինանսական հաստատությունների կանխատեսումները ոչ միշտ են փայլում բարձր ճշգրտությամբ, վկայում են նաեւ դրանց հաճախակի վերանայումները։ Ընդ որում՝ փոփոխությունները երբեմն կտրուկ են լինում։ Պատահական չէ, որ եթե տարեսկզբին նրանք Հայաստանում նույնիսկ ավելի քան 3 տոկոս տնտեսական աճի սպասումներ ունեին, ապա վերջերս արդեն խոսում են անկման մասին։ Չի բացառվում, որ երեք ամիս հետո կանխատեսումները դարձյալ վերանայվեն, այդ թվում՝ ինչպես անկման, այնպես էլ աճի ուղղությամբ։
Հայաստանում տնտեսական իրավիճակը չի փայլում բարձր ակտիվությամբ, այնուհանդերձ այնպիսի տպավորություն է, որ միջազգային կազմակերպությունների գնահատականները չեն բխում օբյեկտիվ իրականությունից։ Պատահական չէ, որ տարեսկզբի տնտեսական ակտիվության աճի պայմաններում սպասումները տարօրինակ ձեւով գնալով վատանում են։ Առավել եւս, որ այնքան էլ պարզ չէ, թե ինչ նոր խոչընդոտներ են առաջացել տնտեսության համար։ Թվում է, իրավիճակը հիմնականում մնացել է նույնը, եթե չասենք, որ նկատելի են նույնիսկ դրական գործոններ արտաքին եւ ներքին հատվածում։
Հրապարակումն ամբողջությամբ՝ «Հայոց աշխարհ» թերթի այսօրվա համարում:
