Սյունիքի մարզպետ Սուրիկ Խաչատրյանը Եռաբլուրում ասել էր, որ մեր մեծերը, օրինակ, Վազգեն Սարգսյանը, եթե ողջ լիներ, մեծ բան չէր փոխվելու Հայաստանում, որովհետեւ շրջափակման մեջ ենք: Ըստ նրա, անձը ոչինչ փոխել չէր կարողանալու եւ ով էլ լիներ իշխանության գլուխ՝ այսպես էր լինելու. «Եթե մի պետություն 25 տարի պատերազմի մեջ է ու շրջափակման մեջ, կարո՞ղ ենք միանգամից ավելի լավ բաների սպասել»:
Այսօր Կարեն Դեմիրճյանի ծննդյան 83- ամյակն է եւ Aravot.am-ը տիկին Ռիմա Դեմիրճյանից հետաքրքրվեց՝ համաձա՞յն է ՀՀԿ-ականի այդ կարծիքի հետ: Ռիմա Դեմիրճյանը պատասխանեց. «Իհարկե, զգալի չափով համաձայն եմ: Դժվար է հիմիկվա ղեկավարության վիճակը: Ի՞նչ պետք է աներ այսպիսի հարեւանների հետ, շրջափակման մեջ: Ես համաձայն եմ, եւ ես չեմ կարող պնդել, որ եթե Կարեն Սերոբիչը ողջ լիներ, ամեն ինչ հիանալի կլիներ: Ես այդպիսի բան չեմ ասի: Դժվարությունները մնում էին բոլորի համար: Բայց, իհարկե, նա զարմանալի ունակություն ուներ անելանելի վիճակից ինչ-որ ելքեր գտնելու: Ես ականատես եմ եղել: Հնարավոր է, որ ինչ-որ ելք գտներ, ինչ-որ լեզու գտներ եթե ոչ մերձավոր հարեւանների, ապա հեռավոր ղեկավարների հետ: Հնարավոր էր: Բայց ես չեմ կարող պնդել, որ ամեն ինչ լավ կլիներ: Համեմատաբար լավ կլիներ»:
Հռիփսիմե ՋԵԲԵՋՅԱՆ
