Վերջին շրջանում ԵՄ-Հայաստան հարաբերությունները բավական ակտիվացել են եւ դա շատ դրական է: Այսօր, խորհրդարանում հրավիրված լսումների ժամանակ արձանագրեց ԱԺ եվրոինտեգրման հարցերի մշտական հանձնաժողովի նախագահ Նաիրա Զոհրաբյանը: Լսումները հրավիրել է ԱԺ եվրոինտեգրման հարցերի մշտական հանձնաժողովը`մայիսին Ռիգայում կայանալիք ԵՄ հերթական գագաթաժողովին ընդառաջ քննարկելու Հայաստան-ԵՄ օրակարգը:
Նաիրա Զոհրաբյանը չի կարծում, որ Ռիգայում համապարփակ փաստաթուղթ կլինի, բայց «հիմնական կոդերը կփաստարկվեն»: Ըստ բանախոսի, մոտավորապես կարելի է պատկերացնել այն օրակարգը, որը Հայաստան-ԵՄ ապագա հիմնարար փաստաթղթում կլինի`քաղաքական երկխոսություն, վիզաների ազատականացում, առեւտրատնտեսական հարաբերություններ:
Տիկին Զոհրաբյանն անդրադարձավ նաեւ Եվրոպական խորհրդարանի կողմից երկու օր առաջ Հայոց Ցեղասպանության 100-րդ տարելիցի առիթով ընդունած հայտարարությանը: Նա փաստեց, որ երկրորդ անգամ անդրադառնալով այդ խնդրին Եվրոպական խորհրդարանը փաստեց, որ որեւէ քաղաքական ու տնտեսական շահ չի կարող արդարությունից վեր լինել:
Ի դեպ, ինչպես միշտ, այս անգամ էլ լրագրողների համար աշխատանքային պայմանները հաշվի առնված չէին: Այն անձինք, ովքեր սեղանի շուրջ նստելու պատվին չէին արժանացել, թարգմանությունից օգտվելու հնարավորություն չունեն: Ինչպես հայտարարվեց, ԱԺ-ն տեխնիկապես հնարավորություն չէր ունեցել թարգմանություն ապահովել:
Կարդացեք նաև
Նելլի ԳՐԻԳՈՐՅԱՆ
