«Խորհրդային միության փլուզումից եւ Գյումրիի երկրաշարժից հետո Հայաստան ներթափանցեց աղանդավորական կազմակերպությունների մեծ խումբ, հիմնականում՝ Արեւմուտքից»,- ապրիլի 16-ին «Պոստ սկրիպտում» մամուլի ակումբում տեսակամրջի ընթացքում հայտարարեց «Քայքայիչ պաշտամունքից տուժածների վերականգնողական եւ օգնության կենտրոնի» նախագահ Ալեքսանդր Ամարյանը:
Տեսակամրջի ընթացքում հայ, ռուս, վրացի փորձագետներն իրենց տեսակետները հայտնեցին «Ոչ ավանդական կրոնական շարժումներ» թեմայով:
Ալեքսանդր Ամարյանը նշեց, որ Հայաստանում գրանցված կրոնական կազմակերպությունների թիվը 65 է, բայց առանց գրանցման գործում է 250-ից ավելի կազմակերպություն. «Դա մոտավորապես բնակչության 15 տոկոսն է : Կրոնական կազմակերպությունների հիմնական նպատակն է վերացնել այն, ինչ եղել էր մինչեւ Խորհրդային միության փլուզումը: Նրանց գլխավոր առաջադրանքը հայ ժողովրդին պառակտելն է, պառակտման դեպքում շատ դյուրին է անել այն, ինչ պետք է Արեւմուտքին: Կազմակերպությունների ակտիվացումը գրանցվել է գունավոր հեղափոխության փորձերի ժամանակ»:
Նա համարում է, որ կրոնական կազմակերպության անդամներին հեշտ է օգտագործել ընտրությունների, միջոցառումների եւ զանգվածային անկարգությունների ժամանակ: Ըստ նրա՝ կրոնական կազմակերպությունների միջոցով նաեւ փողերի ակտիվ լվացում է կատարվում. «Մեր օրենքներով՝ եկեղեցին անջատված է պետությունից, եւ նրանց ոչ ոք իրավունք չունի ստուգել: Դա անվտանգության գլխավոր խնդիրն է, կարծում եմ ոչ միայն Հայաստանում, այլ նաեւ բոլոր հետխորհրդային երկրներում»:
Կարդացեք նաև
Ամի ՉԻՉԱԿՅԱՆ
