Ինֆորմացիոն տեխնոլոգիաների ձեռնարկությունների միությունը (ԻՏՁՄ) և «Քրոնիմետ» բարեգործական հիմնադրամը նախաձեռնել են Digicode կիրառական ծրագրավորման պատանեկան մրցույթ: Digicode մրցույթի նպատակն է դպրոցականների շրջանում խթանել կոդավորման նկատմամբ հետաքրքրությունը, զարգացնել ալգորիթմական մտածողությունը և ստեղծագործականությունը, ինչպես նաև բացահայտել տաղանդավոր պատանիներին։
Այսօր լրագրողների հետ հանդիպման ժամանակ ԻՏՁՄ փոխտնօրեն Հայկ Չոբանյանը նշեց. «Աշխարհի թվային հեղաշրջումը մրցակցային նոր մարտահրավերներ է նետում, որտեղ կոդավորումը դառնում է օտար լեզվի իմացության պես անհրաժեշտ: Մենք իրավունք չունենք մեր երեխաներին զրկել այդ հնարավորությունից՝ սկսած դպրոցական տարիքից: Հույս ունենք, որ Հայաստանի և սփյուռքի կրթական հաստատություններն ակտիվորեն կներգրավվեն և ցույց կտան, որ մեր պատանիներն ու աղջիկները շարժվում են արդի համաշխարհային միտումներին համընթաց»:
«Չափազանց կարևոր ենք համարում դպրոցական տարիքից երեխաներին տեխնոլոգիական զարգացմանը հաղորդակից դարձնելը: Ծրագրավորման լեզուների ուսանումը նաև մեծ դեր կխաղա՝ դեպի արագ զարգացող տեխնոլոգիական ոլորտ պատանիներին ուղղորդելու առումով», – ասաց «Քրոնիմետ» բարեգործական հիմնադրամի փոխտնօրեն Դիանա Ավդալյանը։
Digicode կիրառական ծրագրավորման պատանեկան մրցույթի ղեկավար Շուշան Գրիգորյանը նշեց. «2013 թ. մեկնարկած «Ռոբոտաշինությունը սկսվում է դպրոցից» ծրագրում ներգրավված ավելի քան 800 աշակերտ, ինչպես նաև «Թումո» ստեղծարար տեխնոլոգիաների կենտրոնի և «Այբ» դպրոցի սաները արդեն կիրառում են Scratch (Աղվես), K-Turtle(Կրիա) ծրագրերը, որոնք կարճ ժամանակում հասցրեցին սիրվել նրանց կողմից, ինչն էլ մեզ համար առիթ հանդիսացավ մեկնարկել նոր մրցույթ` հենց Scratch (Աղվես) սիրահարների համար: Scratch և K-Turtle ծրագիրը Մասաչուսեթսի տեխնոլոգիական համալսարանի (MIT) կողմից մշակված ծրագրավորման միջավայրեր են, որոնցում հեշտությամբ կարող են աշխատել աշակերտները, ուսանողները, ուսուցիչներն ու ծնողները: Աղվես և Կրիա ծրագիրը նշված ծրագրի հայաֆիկացված և նոր մոդուլներով համալրված տարբերակներն են: Մրցույթի նպատակներից է նաև բացահայտել շահագրգիռ դպրոցների և անհատների, ովքեր մոտ ապագայում կհամալրեն ռոբոտաշինության խմբակների շարքերը»:
Կարդացեք նաև
Նշենք, որ մրցույթին կարող են մասնակցել ինչպես դպրոցահասակ երեխաները, այնպես էլ ոչ դպրոցականներ, ովքեր ցանկություն ունեն ղեկավարելու այս խմբակները:
Խմբակավարներն ու աշակերտները կմրցեն տարբեր անվանակարգերում: Մրցույթի հաղթողներին սպասվում են դրամական պարգևներ, դասընթացներ, ճամբարի ուղեգրեր, սարքավորումներ, ռոբոտի դետալներ և ՏՏ ընկերությունում պրակտիկայի հնարավորություն:
Մրցույթի պայմաններին ծանոթանալու համար սեղմեք այստեղ :
Շուշանիկ Ներսեսյան
Ինֆորմացիոն տեխնոլոգիաների ձեռնարկությունների միության
Հանրային կապերի պատասխանատու
