Ապրիլի 12-ին հարավ-արևմտյան Ֆլորիդայի Հոլոքոստի թանգարան-կրթական կենտրոնում Ամերիկայի հայկական համագումարի (Համագումարի) կապերի բաժնի տնօրեն Թանիել Քուշաքջյանը ներկայացրել է «Հայոց ցեղասպանության պատկերային նկարների» ցուցադրությունը` հիշատակելու Հայոց ցեղասպանության 100-րդ տարելիցը:
Քուշաքջյանը քայլ առ քայլ քննարկել է սպանությունների համակարգային բնույթը, և ներկայացրել 20 նկարների ցուցադրություն` կարևորելով մանրամասների փաստարկումը լուսանկարների միջոցով, որոնք արվել են այդ ժամանակի ականատեսների, այդ թվում` ամերիկացի միսիոներների և գերմանացի սպաների կողմից: Թվով 4-րդ` «Հայոց ցեղասպանության պատկերային նկարներ» թվային ցուցահանդեսը մեկնարկել է անվճար և համախմբում է միասնական հավաքածուի հիմնական պատկերները, որոնք արձանագրում են Օսմանյան կայսրությունում հայ ժողովրդի հանդեպ դաժան վերաբերմունքը և նրանց պատմական համայնքների լիակատար ոչնչացումը:
Մայամիում Թուրքիայի հյուպատոսությունը նամակ է ուղարկել` փորձելով խոչընդոտել Հայոց ցեղասպանության վերաբերյալ քննարկմանը: «Խայտառակություն է, որ հայկական Սփյուռքը նախընտրում է ատելությունը թուրքերի հանդեպ, այլ կերպ ասած անտեսում է Թուրքիայի ու Հայաստանի միջև հարաբերությունների բարելավման հնարավորությունները»,-Հոլոքոստի թանգարանին ուղված նամակում գրել է Մայամիում Թուրքիայի հանրապետության գլխավոր հյուպատոս Օզգյուր Քըվանչ Ալթանը: «Սա մտահոգիչ է, բայց ոչ զարմանալի, քանի որ վերջին տարիներին հայկական Սփյուռքը ձգտում է յուրացնել Հոլոքոստը` փորձելով հավաքական աջակցություն ցուցաբերել ներկայացնելու 1915թ.-ի խեղաթյուրված իրադարձությունները»,- ասվում է նամակում:
«Մենք խորապես գնահատում ենք Հոլոքոստի թանգարանի ղեկավարության` ըստ պլանավորածի ծրագիրը շարունակելու որոշումը և վստահենք, որ Թանիելի ներկայացումը լավ է ընդունվել»,-հայտնել է Համագումարի գործադիր տնօրեն Բրայան Արդունին` հավելելով. «Չնայած ճշմարտությունը լռեցնելու ցինիկ փորձերին, այն կբարձրաձայնվի»:
Կարդացեք նաև
Ամերիկայի հայկական համագումար
