Ադրբեջանում շատ լրագրողներ, քաղաքական ակտիվիստներ, իրավապաշտպաններ պետական դավաճանության, թմրամոլության, խուլիգանության, փողեր լվանալու եւ այլ կեղծ հոդվածներով ձերբակալվել են, հալածանքների ենթարկվել: Շատերը ստիպված են եղել հեռանալ Ադրբեջանից, այլ երկրներում քաղաքական ապաստան խնդրել: Իսկ Ադրբեջանի նախագահի օգնական Ալի Հասանովն Ադրբեջանը համարում է աշխարհի ամենաժողովրդավար երկրներից մեկը: Ըստ ադրբեջանական ԶԼՄ-ների՝ Հասանովն ասել է. «Բոլորը գիտեն, որ այսօր Ադրբեջանում լրատվամիջոցների ազատության,մարդու իրավունքների եւ քաղաքական ազատությունների առումով իրավիճակը չի զիջում աշխարհի ոչ մի երկրի» : Նա ասել է, որ աշխարհում հակաիսլամական եւ հակաթուրքական արշավ է իրականացվում, եւ տիրում են երկակի չափանիշներ:
Ադրբեջանի նախագահի օգնականը հայտարարել է. «Ցավոք սրտի, այդ միտումները նկատելի են նաեւ որոշ միջազգային իրավապաշտպան կազմակերպությունների գործունեության մեջ, որոնք գործում են հայկական լոբբիի աջակցությամբ: Ադրբեջանի հասարակությունը հիանալի գիտի, որ Ադրբեջանի մասին բացասական կարծիք ձեւավորելու այդ փորձերը ոչ մի հիմք չունեն: Այն ուժերը, որոնք կանգնած են այդ արշավի հետեւում, ոչնչի են հասնի»:
Ոսկան ՍԱՐԳՍՅԱՆ
