«Պատարագն ինքնին հետաքրքիր էր, սակայն զուտ պատարագը չէր խնդիրը, այլ պատարագի արձագանքները եւ հաջորդող իրադարձությունները»,- ապրիլի 15-ին «Փաստարկ» մամուլի ակումբում լրագրողների հետ հանդիպման ընթացքում ասաց կրոնագետ Հովհաննես Հովհաննիսյանը:
Նրա խոսքերով՝ կանխատեսելի էր, որ Թուրքիան կոշտ կարձագանքի: Նա նկատեց, որ փորձ է գործադրել ամեն ինչ տեղափոխել կրոնի դաշտ. «Այստեղ, կարծում եմ, գործ ունենք պարզ մանիպուլյացիայի հետ, քանի որ Վատիկանը ոչ միայն կրոնական կառույց է, այլ նաեւ պետական: Եվ Վատիկանի կարծիքը նաեւ պետական կարծիք է, ինչի համար էլ տարբեր երկրներ այնտեղ դեսպանություններ ունեն: Մենք շատ հաճախ պատրաստ չենք լինում ճիշտ օգտագործել նման բարձունքները, եւ այս մի քանի օրերի ընթացքում տեսանք, որ մեր պետական մարմիններից պատասխան արձագանք այդպես էլ չհնչեց, դա ցույց է տալիս, որ շատ տեղերում մեր դիվանագիտական կորպուսը բոբիկ է եւ չի կարողանում դիմագրավել հակառակ հարձակումներին»:
Մանրամասները՝ տեսանյութում:
Հովհաննես Հովհաննիսյանը համարում է, որ Հռոմի Պապի հայտարարությունը պետական մակարդակով սրեց Հայաստան-Թուրքիա հարաբերությունները. «Վերջին տարիներին քաղաքացիական հասարակությունը կենտրոնանում է հասարակական մակարդակում հաղորդագրությունը տեղ հասցնելուն: Ժամանակակից Թուրքիան, եթե ապագայում երբեւէ ընդունի Հայոց ցեղասպանությունը, դա կլինի միայն այն պարագայում, երբ հասարակական ճնշում լինի՝ ներքեւից դեպի վերեւ: Բայց այսօրվա Թուրքիայում եւ այն Թուրքիայում, որը իսլամականացման դարաշրջան է ապրում, համենայն դեպս Էրդողանի իշխանապետության տարիներին, չի կարելի պատկերացնել, որ նման փոփոխություններ կլինեն եւ հասարակությունը դեպի վերեւ ճնշում կգործադրի»:
Կարդացեք նաև
Ամի ՉԻՉԱԿՅԱՆ
