Ուսումնասիրելով գյուղատնտեսության ոլորտում իրականացվող աջակցության ծրագրերը, Վերահսկիչ պալատը ուշագրավ փաստ է արձանագրել. չնչին տոկոսներով ներգրավված վարկը մինչեւ գյուղացուն հասնելը տասնապատիկ թանկացել է։ 0,75 տոկոսով ստացված գումարը ծրագրերի իրականացման գրասենյակով եւ ֆինանսական հաստատություններով անցնելուց հետո դարձել է մինչեւ 17,7 տոկոս։ 2014թ. հաշվետվության մեջ Վերահսկիչ պալատն անդրադարձել է նաեւ գյուղատնտեսության ոլորտին։ Մասնավորապես իրականացվող ծրագրերին։
«Շուկայավարման հնարավորություններ ֆերմերներին» ծրագրով նախատեսված է եղել ենթավարկերի տրամադրում։ Դրանով նպատակ է դրվել նպաստել փոքր եւ միջին գյուղական բիզնեսի զարգացմանը, ֆերմերների եւ գյուղական ձեռնարկությունների՝ շուկաներից օգտվելու հնարավորությունների բարելավմանը, գյուղական տարածքներում շուկայական ուղղվածություն ունեցող մասնավոր եւ հասարակական ներդրումների խթանմանը։
Ծրագրի իրականացմանը մասնակցել է երկու բանկ եւ հինգ վարկային կազմակերպություն։ Ֆինանսական այդ կառույցներից ստացվել է փոխառությունների տրամադրման 92 հայտ։ Դրանք բավարարվել են ծրագրերի իրականացման գրասենյակին տրամադրված միջոցների հաշվին։ Այստեղից էլ մեկնարկել է վարկերի թանկացման ամբողջ գործընթացը.
-Ֆինանսական միջոցները ԾԻԳ-ին տրամադրվել են տարեկան 0,75 տոկոս տոկոսադրույքով, իսկ ԾԻԳ-ն իր հերթին բանկերին եւ ունիվերսալ վարկային կազմակերպություններին գումարը տրամադրել է ԱՄՆ դոլարի դեպքում 4 տոկոսով, իսկ ՀՀ դրամի դեպքում՝ 9,9.75 եւ 10 տոկոսով,- 2014թ. տարեկան հաշվետվության մեջ արձանագրել է Վերահսկիչ պալատը։
Կարդացեք նաև
Թեպետ, ի տարբերություն նախորդների, այս անգամ ՎՊ-ն խուսափել է հաշվետվության մեջ երեւույթին գնահատական տալուց, այնուհանդերձ ակնհայտ է, որ այս օղակում տեղի է ունեցել ներգրավված միջոցների էական թանկացում։
Ծրագրերի իրականացման գրասենյակով անցնելուց հետո ֆինանսական հաստատություններին դոլարով տրամադրված գումարների գինը բարձրացել է ավելի քան 5 անգամ։ Թանկացումը շատ ավելի մեծ է եղել դրամով տրամադրված միջոցների դեպքում։ Հասկանալի է, որ այստեղ, կապված ազգային արժույթի արժեզրկման հավանականության հետ, ռիսկայնությունն ավելի մեծ է։ Սակայն արդյոք այնքա՞ն, որքան գնահատել է ԾԻԳ-ը։
Ս. ԲԵԳԼԱՐՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
