Վահրամ Պողոսյանը համարում է, որ «Ազգային վերածնունդ» կուսակցությունը պարզապես փորձում է սեփական շահերի համար ընտրողներին թյուրիմացության մեջ գցելով շահարկել ընտրությունների հետ կապված ամենատարբեր հարցերը:
«Նման հայտարարությունները անհիմն են եւ ընտրության օրինականության վրա ստվեր գցելու փորձեր են»,- Aravot.am-ի հետ զրույցում, անդրադառնալով «Ազգային վերածնունդ» կուսակցության հայտարարությանը, ասաց «Ազատ հայրենիք» կուսակցության մամուլի խոսնակ Վահրամ Պողոսյանը:
«Ազգային վերածնունդ» կուսակցությունը հայտարարություն էր տարածել, թե վերջին օրերի ընթացքում ԼՂՀ հատուկ ծառայությունները ահաբեկում եւ սպառնում են կուսակցության կենտրոնական շտաբի տարածքի տիրոջը:
Այդ սպառնալիքների արդյունքում շտաբի տերը խնդրել է «Ազգային վերածնունդին» մինչեւ առավոտ ազատել շտաբի տարածքը:
Կարդացեք նաև
Վահրամ Պողոսյանը համարում է, որ շտաբի մասին հայտարարությունը կենցաղային հարցերը քաղաքականացնելու փորձ է. «Կուսակցություն, որը փորձում է ամենատարբեր ձեւերով մարդկանց ուշադրությունը գրավել, չեմ կարծում, որ որեւէ լուրջ հիմնավորման կարիք ունի: Սրանք ընդամենը փորձեր են ստվեր գցելու ԼՂ-ում խորհրդարանական ընտրական գործընթացի վրա, եւ միանշանակ, մեզ համար դրանք անընդունելի են: Նամանավանդ, երբ կենցաղային հարցում նրանք փորձում են շահարկել անգամ Լեռնային Ղարաբաղի Հանրապետության նախագահի անունը»:
Նա հավելեց, որ կուսակցության հայտարարությունները ոչ միայն անհիմն են, այլ նաեւ՝ անպատասխանատու. «Բացի «Ազգային վերածնունդ» կուսակցությունից կան նաեւ այլ ընդդիմադիր քաղաքական ուժեր, որոնք կարծես թե այս ընթացքում որեւէ նման լուրջ բողոք չեն ներկայացրել: Դա մեկ անգամ եւս խոսում է այն մասին, որ այդ կուսակցությունը պարզապես փորձում է սեփական շահերի համար ընտրողներին թյուրիմացության մեջ գցելով շահարկել ընտրությունների հետ կապված ամենատարբեր հարցերը»:
Կոմունիստական կուսակցության գլխավոր քարտուղար Հրանտ Մելքումյանն Aravot.am-ին հայտնել էր, թե կուսակցության նկատմամբ ճնշումներ են իրականացվում հեռուստատեսությունում անվճար եթեր չտրամադրելով:
Վահրամ Պողոսյանի խոսքերով՝ հեռուստաեթերը հավասարապես բոլոր կուսակցություններին է բաշխված. «Այնպես չէ, որ որեւէ մեկ կուսակցության քարոզարշավի լուսաբանումը մյուսից որեւէ բանով տարբերվում է: Դա պարզ է, բոլորն են տեսնում»:
Ամի ՉԻՉԱԿՅԱՆ
