Այսօր Ազգային ժողովում տեղի է ունեցել աշխատանքային այցով Հայաստան ժամանած ԵԽԽՎ նախագահ Անն Բրասերի և ԵԽԽՎ-ում հայկական պատվիրակության անդամների միջև հանդիպումը, որի ընթացքում անդրադարձ է կատարվել «Բռնությունների սրացումը Լեռնային Ղարաբաղում և Ադրբեջանի այլ գրավյալ տարածքներում» վերնագրված զեկույցի նախագծին: ԱԺ պատվիրակության ղեկավար Հերմինե Նաղդալյանը կրկին հաստատել է, որ հայկական պատվիրակությունը չի պատրաստվում համագործակցել այդ հարցով զեկուցող նշանակված բրիտանացի պատգամավորի հետ, քանզի ի սկզբանե հարցականի տակ է դրված զեկույցի անաչառությունը: Տիկին Նաղդալյանը ԵԽԽՎ նախագահին ևս մեկ անգամ ընդգծել է այն կարևոր հանգամանքը, որ եթե Եվրոպայի խորհուրդը ԼՂ-ի մասին զեկույց է պատրաստում, ապա այն պետք է պատրաստի ԼՂՀ-ում, ԼՂ ժողովրդի հետ համագործակցելով, մինչդեռ բրիտանացի պատվիրակը, ըստ տեղեկությունների, ցանկություն չի հայտնել այցելել Լեռնային Ղարաբաղ:
Տիկին Բրասերի՝ պատվիրակությունների միջեւ վստահության մակարդակը բարձրացնելուն վերաբերող առաջարկին ի պատասխան՝ տիկին Նաղդալյանը նշել է, որ դրա նախապայմանը պիտի լինի ԵԽԽՎ-ի կողմից նման զեկույցներից հրաժարումը:
Տիկին Նաղդալյանը նկատել է, որ խնդրի կարգավորման համար բավարար չեն Հայաստանի ջանքերը, քանի որ Ադրբեջանը շարունակում է իր ռազմատենչ հռետորաբանությունն ու գործողությունները:
Անն Բրասերն իր խոսքում նշել է, որ ԼՂ բնակչությունը ԵԽ-ի 820 միլիոնանոց ընտանիքի մաս է կազմում, որի մասին Եվրոպայի խորհրդում պետք է հոգ տանեն: Այս հանգամանքը Հ. Նաղդալյանը ոգևորող համարեց՝ հույս հայտնելով, որ այսպիսով քայլեր կձեռնարկվեն ԼՂ-ի գոնե խորհրդարանական կառույցների հետ երկխոսություն սկսելու ուղղությամբ և որ ամենակարևորն է ՝ ԵԽ-ն համագործակցություն կսկսի ԼՂ ընտրված իշխանությունների հետ:
Կարդացեք նաև
Մամլո հաղորդագրություն
