Թուրքիայի վարչապետ Ահմեդ Դավութօղլուն Հռոմի Պապի՝ հայերին որպես 20-րդ դարի առաջին ցեղասպանության զոհեր կոչելը որակել է որպես սխալ դիտարկում, որը նպաստում է Եվրոպայում ռասիզմի զարգացմանը։
Հիշեցնենք, որ Հռոմի պապը երեկ Վատիկանի Սուրբ Պետրոս եկեղեցում պատարագ է մատուցել 1915 թվականին Օսմանյան կայսրության կողմից իրականացրած Հայոց ցեղասպանության զոհերի հիշատակին, որի ժամանակ թուրքերի կողմից հայերի դեմ իրականացվածն անվանել է՝ 20-րդ դարի առաջին ցեղասպանություն:
«Europeonline-magazine»-ի փոխանցմամբ՝ Դավութօղլուն մասնավորապես ասել է, որ Պապի դիտողությունները «կեղծ եւ անհեթեթ» էին եւ կարող են «նպաստել Եվրոպայում ռասիզմի աճին»։ Դավութօղլուն նաեւ Կաթոլիկ առաջնորդին մեղադրել է միայն մեկ կողմի տառապանքների վրա կենտրոնանալու համար։
Dailysabah.com կայքն էլ տեղեկացրել է, որ այսօր տեղի ունեցած մամուլի ասուլիսի ընթացքում, անդրադառնալով Հռոմի Պապի վերոնշյալ խոսքերին, Թուրքիայի արտաքին գործերի նախարար Մևլութ Չավուշօղլուն ասել է, որ դա հակասում է պատմական եւ իրավական փաստերին։
Կարդացեք նաև
«Պապը 1915 թվականի իրադարձությունները անվանել է ցեղասպանություն, ինչը բացակայում է, չկա որեւէ իրավասու դատարանի որոշումներում։ Իսկ Բոսնիայում եւ Ռուանդայում տեղի ունեցած իրադարձությունները անվանում է զանգվածային սպանություն այն դեպքում, երբ դրանք ճանաչված են որպես ցեղասպանություններ իրավասու միջազգային դատարանների կողմից։ Այստեղ կա հակասություն եւ խտրականություն»,- մասնավորապես ասել է նա։
Պատրաստեց Աշոտ ԻՍՐԱԵԼՅԱՆԸ
