Շատերն են խորոված միս սիրում, սակայն կրակ անել եւ մանղալի վրա խորոված պատրաստել՝ միշտ եւ բոլորին չէ, որ հաջողվում է: Այս դեպքում մեզ կարող են օգնության հասնել բամբուկի փայտիկները եւ գրիլ թավան: Այս եղանակով պատրաստված «խորովածիկները» շատ են սիրում հատկապես երեխաները, եւ մանկական հավաքույթների համար շատ հարմար տարբերակ է:
Ընդ որում, կարող եք պատրաստել ոչ միայն հավի, այլեւ՝ խոզի կամ գառան մսով:
Անհրաժեշտ մթերքները
Հավի կրծքամիս- 4-5 կտոր
Կարդացեք նաև
Կարմիր կամ գունավոր թարմ պղպեղներ-2-3 հատ
Գլուխ սոխ- 2 հատ
Համեմունքներ ըստ ճաշակի
Պատրաստման եղանակը
Հավի կրծքամիսը կտրատել փոքրիկ խորանարդաձեւ կտորներով: Համեմել ըստ ճաշակի, օրինակ՝ տարբերակ 1. 1 թեյի գդալ աղ, մեկական պտղուց սեւ եւ կարմիր պղպեղներ, կես թեյի գդալ չորացրած կանաչի (հազրեվարդ, ծիթրոն կամ ուրց), 2 ճաշի գդալ ձիթապտղի յուղ եւ 2 պճեղ քերած սխտոր կամ տարբերակ 2. 1 թեյի գդալ աղ, նույնքան քարրիի փոշի, մեկական պտղուց դարչին, քիմիոն, 1-2 սմ-անոց կտոր թարմ, քերած կոճապղպեղ, 2 պճեղ քերած սխտոր 2 ճաշի գդալ մածուն:
Թողնել մնա մի քանի ժամ (2-3 ժամ կարող է մնալ սենյակային ջերմաստիճանում, 1-2 օր՝ սառնարանում):
Լվանալ թարմ պղպեղները, մաքրել եւ լվանալ գլուխ սոխը: Կտրատել քառանկյունաձեւ: Փայտիկների վրա հերթականությամբ շարել՝ բանջարեղենն ու հավի կտորները:
Շատ լավ տաքացնել գրիլ-թավան: Փայտիկներով հավիկները դնել թավայի վրա եւ տապակել բոլոր կողմերից:
Կարող եք մատուցել խորոված բանջարեղենի կամ բրնձի հետ: Այս խորովածիկների հետ շատ է սազում քամած մածունով թանձրուկը՝ քամած մածունի հետ խառնեք մի քիչ ձիթապտղի յուղ եւ մի պճեղ սխտոր, աղացած կարմիր պղպեղ:
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ» օրաթերթ
11.03.2015
Մելանյա, շնորհակալություն այս շարքի համար: Ձեր կանացի հմայքն ու ջերմությունն էլ է բաղադրատոմսերի հետ փոխանցվում ընթերցողներին:
Անչափ շնորհակալ եմ ջերմ խոսքերի համար, հարգելի Աննա: