Ինչե՞ր են կատարվում սոցթափաթեթների փողերի հետ
«Այլինդա» տուրիստական գործակալությունը 2014թ.-ին պայմանագիր է կնքել Իջեւանի դպրոցների ուսուցիչների հետ, որպեսզի ուսուցիչները սոցիալական փաթեթով իրենց հաշվեհամարին առկա գումարներով հանգիստն անցկացնեն այդ տուրիստական գործակալության միջոցով: Ապրիլի 9-ին հիշյալ գործակալության աշխատողները եղել են Իջեւանի ավագ դպրոցում, ցանկացել այս տարվա համար պայմանագիր կնքել, սակայն ուսուցիչներն ընդդիմացել են: Նրանք մերժել են տուրիստական գործակալության հետ նոր պայմանագիր կնքելու առաջարկը:
Մանկավարժներից մեկը «Այլինդայի» գործակալներին ասել է, որ ավագ դպրոցի 6 ուսուցիչներ 2014թ. դեկտեմբերին հանգստացել են Իջեւանի տարածաշրջանի հյուրանոցներից մեկում,սակայն տուրիստական գործակալությունը դրա դիմաց գումարը դեռ չի փոխանցել հյուրանոցին:
«Այլինդայի» գործակալները փորձել են համոզել ավագ դպրոցի ուսուցիչներին, ասելով՝ դա հաշվապահների թերացումն է, շուտափույթ կերպով այդ գումարները կփոխանցվեն: Նրանք նշված հյուրանոցի տնօրենին փորձել են համոզել, որ այս տարվա համար ծառայությունների մատուցման պայմանագիր կնքվի: Սակայն վերջինս հրաժարվել է:
Կարդացեք նաև
Զանգահարեցինք «Այլինդայի» գործակալ Էդգարին: Վերջինս չցանկացավ լրագրողիս հայտնել իր ազգանունը: Նրան հարցրինք, թե ինչու 2014թ. դեկտեմբերից մինչեւ հիմա, անցած 4 ամսում, հյուրանոցին չեն փոխանցվել գումարները: Նա ասաց, որ պատճառը հայաստանյան բանկերն են, որոնք ուշացրել են գումարների փոխանցումը, իրենք այդ կապակցությամբ նամակներ են գրել բանկերին: Քիչ անց լրագրողիս զանգահարեց «Այլինդայի» գործակալական եւ շուկայական զարգացման տնօրեն Հայկ Դայանը: Վերջինիս ասաց, որ սոցփաթեթների օգտագործման ոլորտում շատ խնդիրներ կան, ինչո՞ւ չենք անդրադառնում դրանց, մասնավորապես՝ գումարների կանխիկացմանը: Դա այն է, երբ մարդիկ չեն օգտվում սոցփաթեթով մատուցվող ծառայություններից, այլ՝ որեւէ հյուրանոցի տնօրենի հետ ծառայությունների մատուցման կեղծ պայմանագիր կնքելով, երկուստեք ձեռնտու ձեւով սոցփաթեթի գումարը կանխիկացնում են:
Հ. Դարյանն ասաց, որ բանկերն են ուշացրել իրենց դրամական փոխանցումները, այդ պատճառով տուրիստական գործակալությունները որոշ բանկերի հետ դադարեցրել են համագործակցությունը: Սակայն նա չնշեց որեւէ բանկի անուն: Դայանը հայտնեց, որ ապրիլի 8-ին որոշ ընկերություների իրենք պարտքի գումարներ են փոխանցել, այդ գործընթացը կկատարվի նաեւ հետագա 2 օրերին:
«Այլինդան» Իջեւանի տարածաշրջանի վերոհիշյալ հյուրանոցի հետ կնքած պայմանագրով դրամական փոխանցումը պետք է կատարեր 5 օրվա ընթացքում, սակայն դեկտեմբերից մինչեւ հիմա չի արել: Տեղեկացանք, որ ապրիլի 10-ին «Այլինդան» Իջեւանի տարածաշրջանի վերոհիշյալ հյուրանոցին դեկտեմբերից պարտք մնացած 217 հազար դրամից 50 հազարը փոխանցել է:
Ոսկան ՍԱՐԳՍՅԱՆ
