Այսօր ՀՀ քննչական կոմիտեն ՀՀ Քրեական օրենսգրքի 235-րդ հոդվածի 1-ին մասով, այն է՝ «Ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը պատժվում է կալանքով` առավելագույնը երեք ամիս ժամկետով, կամ ազատազրկմամբ` առավելագույնը երեք տարի ժամկետով» մեղադրանք առաջադրեց Հիմնադիր խորհրդարանի Շիրակի մարզային կառույցի պատասխանատու Արամ Հակոբյանին (լուսանկարում):
Նշենք, որ նրան առաջադրված մեղադրանքը զարմանքով է ընդունվել այս մարզի բնակիչներից շատերի կողմից. նռնակը, որի համար ձերբակալել ու մեղադրանք են առաջադրել Արամ Հակոբյանին, հայտնաբերվել է ոչ թե Հիմնադիր խորհրդարանի պատասխանատուի տան կտուրից, այլ նրա հորեղբոր:
Արամ Հակոբյանի ընկերը՝ նախկին դաշնակցական հոգեբան Աշոտ Հակոբյանն Aravot.am-ի հետ զրույցում վրդովված ասաց. «Ես կասեմ, որ Արամին առաջադրվել է խուժան մեղադրանք, այս նույնը բնականաբար չէին կարող առաջադրել Ժիրոյին կամ Պավլիկին, եթե նրանց առաջադրեին, շատ պրիմիտիվ կլիներ: Արամի պարագայում երևի թե մտածել են ռայոնի գործիչ է, կարելի է գրպանը կամ տան կտուրին մի բան գցել ու գլխին գործ սարքել… Ես ուղղակի բառեր չեմ գտնում կատարվածը որակավորելու համար»:
Նա տեղեկացրեց, որ Արամ Հակոբյանը ապրում է դեղերից կախված վիճակում, նրա գլուխը վիրահատված է, վիրահատված է նաև ստամոքսը, արյան ճնշումը սարսափելի բարձր է: Նա նաև ասաց, որ Արամ Հակոբյանը Գյումրու Անի թաղամասում գտնվող օլիմպիական մարզական բարձրագույն վարպետության դպրոցի փոխտնօրենն է: Արամ Հակոբյանի որդին ՝ Ռոբերտը, ևս հաստատեց, որ իր հոր առողջական վիճակը նորմալ չէ, նա պատերազմից հետո 5 ծանր վիրահատություններ է տարել:
Կարդացեք նաև
Նունե ԱՐԵՎՇԱՏՅԱՆ
