«Չինաստանի կողմից Մետաքսի ճանապարհի գործարկումը շատ առավելություններ է տալիս Հայաստանին»,- այսօր «Փաստարկ» մամուլի ակումբում հայտարարեց ԱԺ ֆինանսավարկային եւ բյուջետային հարցերի հանձնաժողովի նախագահ Գագիկ Մինասյանն`անդրադառնալով հայ-չինական եւ հայ-իրանական հարաբերությունների զարգացմանը:
Մետաքսի ճանապարհի մայրուղիներից մեկը պետք է Իրանով անցնի դեպի Սեւ ծով: Այն պետք է կամ Ադրբեջանով անցնի, կամ Հայաստանով: Բանախոսի համար ակնհայտ է, որ Իրանն առավելությունը պետք է տա Հայաստանին, քանզի Ադրբեջանի հետ «ոչ պայծառ» հարաբերություններ ունի, որոնք դեռ կարող են բարդանալ: Կարեւոր է նաեւ Չինաստանի ընտրության խնդիրը: Այստեղ էլ, Գագիկ Մինասյանի համոզմամբ, Չինաստանի շահերը համընկնում են Իրանի հետ:
Հայաստանի նախագահի Չինաստան կատարած այցի, ձեռք բերված պայմանավորվածությունների, հայ-չինական եւ հայ-իրանական հարաբերությունների մասին ՀՀԿ-ական պատգամավորի վերլուծությունները` տեսանյութում:
Իշխանական պատգամավորը չափազանց կարեւոր է համարում, որ մեր պետությունն անի քայլեր, որ ապացուցի մեր բոլոր հարեւաններին` որեւէ պետության հետ չունի առանձնահատուկ դիրքորոշում, որը թույլ չի տալիս այլ պետությունների հետ հարաբերությունները զարգացնել: Հայաստանի բազմավեկտոր քաղաքականությունն, ըստ նրա՝ պետք է ի շահ Հայաստանի օգտագործվի: «Պետությունն իր արտաքին քաղաքականությամբ պետք է ցույց տա, որ այն հավասարակշռված հարաբերությունները, որոնք վարել ենք տարիներ շարունակ՝ պահպանվում են»,- ասաց նա:
Կարդացեք նաև
Aravot.am-ի դիտարկմանը, որ Մաքսային միությանն անդամակցելու Հայաստանի անակնկալ որոշումը էականորեն ազդեց Հայաստանի`հուսալի գործընկեր լինելու վարկի վրա, Գագիկ Մինասյանն արձագանքեց. «Գտնվելով բավականին բարդ իրավիճակում, մենք գնացինք Արեւելյան գործընկերության առումով համագործակցության եւ տեւական ժամանակ վեց պետությունների մեջ առաջինն էինք: Սակայն, այդ ծրագրի շարժիչ ուժ հանդիսացող պետությունները չափազանց կոպիտ, սխալ եւ վնասակար դիրքորոշում որդեգրեցին, որի հետեւանքով Արեւելյան գործընկերությունը չկարողացան իրականացնել: Եվրոպան մեզ բազմիցս ասել է, որ եւ-եւ-ի քաղաքականությունը պետք է կարեւոր լինի, բայց իրենք էլ տապալեցին այդ քաղաքականությունը»:
ՀՀԿ-ական գործիչը չափազանց կարեւոր է համարում, որ հիմա ինքը` Եվրոպան, գնում է այն ճանապարհով, որը Հայաստանին մատնացույց էր անում:
Նելլի ԳՐԻԳՈՐՅԱՆ
