Երեկ մամուլի ասուլիսում տրված հարցին՝ հնարավո՞ր է Բաքվի Եվրոպական խաղերում ի նշան հայ մարզիկի հաղթանակի կամ մեդալակիր դառնալու Հայոց Եռագույնը չբարձրացվի, օրհներգը չհնչի, կամ հարեւան հանրապետության մարզասերները վարվեն Բախտիյար Աբբասովի նման, Հայաստանի ձյուդոյի ֆեդերացիայի փոխնախագահ եւ գլխավոր քարտուղար Դավիթ Խիթարյանը պատասխանեց. « Չեմ կարծում նման բան լինի, թեեւ բացառել էլ չեմ կարող:
Ադրբեջանի մարզիկները եկել են Հայաստան, մասնակցել մրցումների, հաղթող ու մրցանակակիր դարձել: Եվ երբ հնչել է նրանց օրհներգը, հայ մարզասերը ոտքի է կանգնել: Այն ժամանակ ամբողջ մարզաշխարհը տեսավ, թե ով ենք մենք, ճանաչեց հային, նրա կրթվածությունը: Հնարավոր է, որ Բաքվում մեր օրհներգի ժամանակ մարզադահլիճը «միամիտ հոսանքազրկվի», դրոշները բարձրացնող «ձողը փչանա»: Եթե ադրբեջանցիները անհարգալից պահեն իրենց, դրանով հայ մարզիկներին չեն նվաստացնի: Դրա փոխարեն իրենց երկիրը խայտառակ կանեն: Իսկ ինչ վերաբերում է Աբբասովի նման պպզելուն, դա իրենց խնդիրն է»:
Աշոտ ՀԱԿՈԲՅԱՆ
