ՄԱԿ-ի Եվրոպական տնտեսական հանձնաժողովի եւ ՄԱԿ-ի զարգացման ծրագրերի աջակցությամբ այսօր Երեւանում տեղի ունեցավ «Ազգային կարողությունների զարգացում Հայաստանի բնակարանային քաղաքականության եւ քաղաքների պլանավորման բնագավառներում» աշխատաժողովը, որի ընթացքում ստորագրվեցին երկու փոխըմբռնման հուշագրեր. ՄԱԿ-ի Եվրոպական տնտեսական հանձնաժողովի եւ ՄԱԿ-ի զարգացման ծրագրերի գրասենյակի եւ ՀՀ կառավարության միջեւ ստորագրվեց փոխըմբռնման հուշագիր, ինչպես նաեւ համագործակցության հուշագիր ստորագրվեց Գորիսի քաղաքապետարանի եւ Կովկասի տարածաշրջանային բնապահպանական կենտրոն հայաստանյան գրասենյակի միջեւ:
Քաղաքաշինության նախարարի տեղակալ Ռուզաննա Ալավերդյանը լրագրողներին տեղեկացրեց, որ այս երկու հուշագրերից առաջինի ընթացքում պլանավորվում է իրականացնել «Երկրի նկարագիր» ծրագիրը, որն իր մեջ ներառում է բնակարանային քաղաքականության, տարածական պլանավորման խնդիրները. «Ենթադրվում է, որ համակողմանի կուսումնասիրվի իրավիճակը Հայաստանում, կառանձնացվեն բոլոր ցավոտ կետերը եւ միջազգային մակարդակով կտրվեն հանձնարարականներ, թե ինչ պետք է անել, որպեսզի դիմակայել հնարավոր մարտահրավերներին բնակարանային ոլորտում եւ պլանավորման ոլորտում»:
Իսկ երկրորդ հուշագրով նախատեսված է Գորիս քաղաքը վերածել «Խելացի քաղաքի». «Սա նպատակ է հետապնդում անել այնպես, որ ստեղծվող միջավայրը լինի մարդու համար բարենպաստ եւ հարմար, որպեսզի ռեսուրսները կիրառվեն ըստ անհրաժեշտության»:
Կարդացեք նաև
Գորիսը Հայաստանի առաջին «խելացի քաղաքն» է լինելու: Իսկ Aravot.am-ի հարցին, թե ինչո՞ւ հենց Գորիսը, այլ ոչ թե Հայաստանի երկրորդ քաղաք համարվող Գյումրին, Ռուզաննա Ալավերդյանը պատասխանեց, որ դա երկարատեւ քննարկումների արդյունքում է ընտրվել. «Դա պայմանավորված է նրանով, որ Գորիսը պահպանել է իր պատմական կերպարը, դա այն հազվադեպ քաղաքներից է, որտեղ քաղաքային միջավայրը հույս է ներշնչում, որ կարող է վերականգնել իր նախնական տեսքը: Նաեւ Գորիսը գտնվում է դեպի Արցախ եւ Իրան տանող կարեւոր ճանապարհային միջանցքում: Բացի դրանից Գորիսում այդքան շատ ներդրումներ չեն արվել, որքան, օրինակ՝ Դիլիջանում»:
Ծրագիրը իր վերջնական ավարտին կհասցվի 15-20 տարվա ընթացքում:
Էլյա ՀՈՎՀԱՆՆԻՍՅԱՆ
