Ինչպես տեղեկացրել ենք, Հիմնադիր խորհրդարանի Շիրակի մարզային կառույցի պատասխանատու Արամ Հակոբյանին ձերբակալել էին ու մեղադրանք էին առաջադրել այն փաստի առթիվ, որ նրա տան կտուրից նռնակ էր հայտնաբերվել: Հարուցվել էր քրեական գործ ՀՀ Քրեական օրենսգրքի 236 հոդվածի 1-ին մասով, այն է` ապօրինի կերպով զենք պատրաստելը:
Ի սկզբանե Արամ Հակոբյանի տնեցիները հայտարարում էին, որ այդ կտուրը բաց է, ով ինչ ուզի կտեղադրի, այս դեպքում նռնակը տեղադրել են՝ նրա գլխին գործ սարքելու համար: Aravot.am-ի հետ զրույցում Արամ Հակոբյանի որդին՝ Ռոբերտն, ասաց, որ այդ տունը իրենց բարեկամինն է, որի և՛ բակն է մյուս կողմից, և՛ հասցեն է տարբեր, գազի, լույսի, ջրի և մյուս կոմունալ վճարները մուծվում են տարբեր հասցեներից:
Արամ Հակոբյանի փաստաբան Տիգրան Եգորյանը Aravot.am-ին փոխանցեց, որ Արամ Հակոբյանը երեկ ցուցմունք է տվել, որտեղ նշել է. «Այն տունը, որի կտուրից ոստիկանները պայթուցիկ սարք են հայտնաբերել, ինձ չի պատկանում, այն իմ հորեղբոր տունն է»:
Պայթուցիկը հայտնաբերվել է Ղուկասյան 15 ա բնակարանից, այլ ոչ թե Արամ Հակոբյանի տան՝ Ղուկասյան 15 հասցեից:
Կարդացեք նաև
Փաստաբանի տեղեկացմամբ, այսօր մեղադրանք է առաջադրվելու ձերբակալվածներին:
Նունե ԱՐԵՎՇԱՏՅԱՆ
