Հասարակական-քաղաքական գործիչ Վահան Հովհաննիսյանի աճյունը Գերմանիայի Դաշնությունից Հայաստան տեղափոխման եւ հուղարկավորության հետ կապված ծախսերը կառավարությունը կփոխհատուցի:
Ինչպես նշված է կառավարության նիստի օրակարգում, փոխհատուցումը կտրամադրվի կառավարության «Հասարակության եւ պետության հանդեպ հատուկ ծառայություններ ունեցած քաղաքացիների մահվան դեպքում հրաժեշտի ծիսակատարության եւ թաղման կազմակերպում, գերեզմանի բարեկարգման, մահարձանի եւ հուշատախտակի պատրաստման ու տեղադրման աշխատանքներին աջակցություն» ծրագրի միջոցներից` 4,7 միլիոն դրամ, եւ արտաքին գործերի նախարարությանը` 5000 եվրոյին համարժեք դրամ:
Կառավարություն ներկայացվող փաստաթղթում գրված է. «Համաձայն ՀՀ մշակույթի եւ արտաքին գործերի նախարարությունների կողմից ներկայացված հաշվետվությունների` ՀՀ հասարակական-քաղաքական գործիչ Վահան Հովհաննիսյանի աճյունը Գերմանիայի Դաշնությունից Հայաստանի Հանրապետություն տեղափոխման եւ հուղարկավորության հետ կապված ծախսերը կազմել են 7,4 միլիոն դրամ:
Նելլի ԲԱԲԱՅԱՆ
