«Հիշեցի Շպիոն Օնոյի պատմությունը»,- ԱԺ նախագահ Գալուստ Սահակյանն այսպես արձագանքեց ՀԱԿ խմբակցության ղեկավար Լեւոն Զուրաբյանի ելույթին՝ գազի հանձնաժողովի եզրակացության մասին:
Իսկ իր ելույթում Լեւոն Զուրաբյանը խոսեց այն մասին, որ այն փաստաթուղթը, որը բերել է Վարդան Այվազյանը եւ ներկայացնում է ԱԺ-ին, լեգիտիմ չէ, հանձնաժողովում չեն քվեարկել:
Լեւոն Զուրաբյանի խոսքերով՝ «Զարմանալու բան չկա, ի վերջո սա կատարվում է մի երկրում, որտեղ կեղծիքի վրա են կառուցում իրենց ամբողջ քաղաքականությունը երկրի բարձրագույն ղեկավարները եւ անպատիժ մնում»:
Նա պատմեց, թե ինչպես սկսեց գազային այս ամբողջ էպոպեան եւ մեզ մինչեւ ուր հասցրեց: Հիշեցրեց, թե ինչպես էին պաշտոնյաները, այդ թվում Սերժ Սարգսյանը հերքում եւ ընդդիմադիրներին սուտ հանում, երբ վերջիններս ասում էին, որ գազը Հայաստանում թանկացել է:
Կարդացեք նաև
Լեւոն Զուրաբյանն ասաց, որ բնականաբար, ինքը գուշակի փայլուն դափնիներ չի վերագրում իրեն եւ ասում, որ ինքը գիտեր գազի թանկացման մասին, իսկ Արմեն Մովսիսյանը եւ մյուսները՝ ոչ. «Իշխանությունները, ի դեմս Սերժ Սարգսյանի, շատ լավ էլ իմացել են այս ամենի մասին, բայց թաքցրել են ժողովրդից: Ինչո՞ւ են թաքցրել, որ ի վերջո մի օր բացվելու է: Որովհետեւ նախագահական ընտրություններում Սերժ Սարգսյանին դա կարող էր վնասել, ինչի պատճառով էլ կուտակվել է 300 մլն-ի պարտքը»:
Նա պատմեց Հունգարիայի վարչապետի օրինակը, որը Հունգարիայի բյուջեի դեֆիցիտի մասին ինֆորմացիան թաքցրել էր ժողովրդից, հետո մի հավաքի ժամանակ նրա խոսքերը ձայնագրել էին ու ներկայացրել ժողովրդին:
Ահա սա էլ Գալուստ Սահակյանին հիշեցրեց Շպիոն Օնոյի անեկդոտը:
Լեւոն Զուրաբյանն ասաց, որ գազի կուտակված պարտքի օրինականացման հարցում իշխանությունները նույնպես դիմել են կեղծիքի, ներկայացնում են դա իբրեւ բյուջետային ծախս. «Եթե բյուջետային ծախս էր, պետք է արտացոլվեր Պետական բյուջեի մասին օրենքում: Իսկ արդյոք պետբյուջեո՞վ պետք է փոխհատուցվեր «ՀայՌուսգազարդին» կուտակված պարտքի համար՝ ապշեցուցիչ պատասխան են տալիս՝ ասելով, որ քանի որ բաժնետեր էր, պարտավոր էր: Բաժնետիրական ընկերությունների բաժնետերերը պարտավորություն չեն կրում նրա պարտավորությունների համար՝ ըստ Բաժնետիրական ընկերությունների մասին օրենքի: Իրականում, ինչպես ցույց է տալիս 2012-ի հոկտեմբերի 24-ի իմ բացահայտումը, գազի գների աստիճանական բարձրացումը, գաղտնի պարտքի կուտակումը եւ դրա փոխհատուցումը պետական բաժնեմասով, որոշվել էր վաղուց՝ դեռեւս 2012-ի սեպտեմբերին, իսկ մնացածն ընդամենը էժանագին ներկայացում էր»:
Իր ելույթի վերջում Լեւոն Զուրաբյանը պատասխանեց Գալուստ Սահակյանի հումորին՝ Շպիոն Օնոյի մասին. «Ինչ վերաբերում է անեկդոտներին, ես Գալուստ Սահակյանի մասին մի անեկդոտ եմ հիշել, բայց հաշվի առնելով, որ այսօր իր ծննդյան օրն է, այսօր կսահմանափակվեմ միայն շնորհավորելով»:
Հիշեցնենք, որ այսօր ԱԺ նախագահի ծննդյան տարեդարձն է: Նա դառնում է 67 տարեկան:
Հռիփսիմե ՋԵԲԵՋՅԱՆ
