«Մեր հայրենիքը զավթած քրեական վարչախմբի գործած արարքը, իրենց կարծիքով, միտում ունի արգելափակել գործընթացները, որոնց դիմում է Հիմնադիր խորհրդարանը եւ «100-ամյակն առանց ռեժիմի» նախաձեռնությունը»,- ապրիլի 7-ին Քննչական կոմիտեի դիմաց լրագրողների հետ հանդիպման ընթացքում ասաց Հիմնադիր խորհրդարանի անդամ Ալեք Ենիգոմշյանը:
Նա շեշտեց, որ իրենց պայքարը միշտ քաղաքական եւ օրինական է եղել. «Այդ պայքարի դեմ այսօր ձեռնարկվեց քրեական միջոցներով քաղաքական նպատակներ հետապնդող պայքար: Մենք ամբողջությամբ մերժում ենք բերված մեղադրանքների քրեական հատկանիշները: Մենք այսօրվա արարքն ամբողջությամբ քրեական ենք գնահատում, ինչպես մինչեւ այսօր մենք վերցրել ենք մարտահրավերը, այսօր եւս շարունակում ենք վերցնել մարտահրավերը եւ շարունակում ենք մեր պայքարը»:
Կարդացեք նաև
Ալեք Ենիգոմշյանը ընդգծեց, որ իրենց օրակարգը ուժի մեջ է մնում՝ 2015 թվականի ապրիլի 24-ին Հայոց ցեղասպանության զոհերին հարգանքի տուրք մատուցելուց հետո՝ երեկոյան, սկսելու են ռեժիմից ձերբազատման քաղաքացիական անհնազանդության պայքարը, որը օրենքի սահմաններում է լինելու:
Մանրամասները շուտով՝ տեսանյութում:
Պարոն Ենիգոմշյանը հավելեց, որ իրենց գաղափարակից ընկերները գտնվում են Ձերբակալվածների պահպանման վայրում, եւ ապրիլի 8-ին իրենք բողոքի ակցիա են պատրաստվում կատարել այդ շենքի դիմաց. «Մենք ընդունում ենք մարտահրավերը, եւ մեր քաղաքական, ազատագրական եւ այս ռեժիմից ձերբազատման պայքարը շարունակում ենք օրինական, ազատագրական, բարոյական, ազգային, մարդկային բոլոր իրավունքներով: Ներկա իշխանությունները, ելնելով իրենց էությունից, էստաֆետը փոխանցել էին քրեական տարրերին, ինչպես մասամբ մենք դրան ականատես եղանք Բերձորում, դա սկսել էին մեքենաների հրկիզմամբ եւ երկու անգամ շարունակեցին Գյումրիում: Այսօր նրանք էստաֆետը վերցրեցին իրենց չակերտավոր օրինական մարմիններին»:
Ամի ՉԻՉԱԿՅԱՆ
