«Կատարվածը քաղաքական հետապնդում է»,- Aravot.am-ի հետ զրույցում, անդրադառնալով Հիմնադիր խորհրդարանի մի շարք անդամների ձերբակալությանը եւ նրանց բնակարանների խուզարկությանը, ասաց ԱԻՄ առաջնորդ Պարույր Հայրիկյանը:
Նրա խոսքերով՝ իշխանությունները փորձում են կանխարգելել ապրիլի 24-ի հետ կապված զանգվածային դրսեւորումները. «Իրավապահների խնդիրը պետք է լինի քաղաքացիների իրավունքների պաշտպանությունը, ոչ թե հակառակը: Քաղաքացիների միջոցներով են ապրում եւ պետք է ծառայեն քաղաքացիներին: Ինչ վերաբերում է պայքարի օրին՝ ապրիլի 24-ը պայքարի օր է ազդարարել ժողովուրդը. Մարդիկ, երբ փողոց դուրս եկան, ասում էին՝ ցեղասպանության հետեւանքները պետք է վերացնել»:
Հիմնադիր խորհրդարանի անդամ Վարդան Հակոբյանը չէր բացառել, որ կատարված գործողությունները կարող են նպաստել նրան, որ քաղաքացիական անհնազանդություն սկսվի եւ կտապալեն Հայոց ցեղասպանության 100-րդ տարելիցին նվիրված միջոցառումները:
Պարույր Հայրիկյանն ասաց, որ չի կարծում քաղաքական ընդվզումը արժի կապել նման երեւույթի հետ. «Չեմ կարծում, որ Հիմնադիր խորհրդարանը նման խնդիր է դրել, որ անպայման պետք է ձախողի ողբերգության հարյուրերորդ տարելիցի հետ կապված միջոցառումները: Բոլոր հայերն այդ օրը նշում են որպես Հայոց ցեղասպանության 100-րդ տարելից, այդ թվում նաեւ իրենք, էլ ինչը պետք է ձախողվի՞»:
Կարդացեք նաև
Ամի ՉԻՉԱԿՅԱՆ
