Այսօր առավոտյան ժամը 7-ին ոստիկանության մի խումբ աշխատակիցներ խուզարկել են Հիմնադիր խորհրդարանի Գյումրու պատասխանատու Արամ Հակոբյանի բնակարանը՝ պատճառաբանելով, որ տեղեկություն են ստացել այն մասին, թե վերջինս զենք է պահում:
Խուզարկության արդյունքում նրա տան կտուրից հայտնաբերել են նռնակ, սակայն Արամ Հակոբյանի մերձավորների ասելով՝ կտուրը բաց է եւ ցանկացած մեկը ցանկացած պահի ինչ ուզի՝ այնտեղ կտեղադրի:
Արամ Հակոբյանին բերման են ենթարկել ոստիկանություն: Այժմ ոստիկանության քրեական հետախուզության բաժնի աշխատակիցները՝ թվով 10 հոգի, խուզարկում են Գյումրու քաղաքապետարանի հին շենքի դիմաց գտնվող Հիմնադիր խորհրդարանի գրասենյակը:
Հիմնադիր խորհրդարանի Գյումրու գրասենյակի ղեկավարի բնակարանը խուզարկելով, ոստիկանները այնտեղից տարել են 2 համակարգիչ, վերցրել են Արամ Հակոբյանի հեռախոսը, Հիմնադիր խորհրդարանի խտասկավառակները, որոշ փաստաթղթեր, ինչպես նաեւ առգրավել են տան գրքերը: Իսկ հատկապես ի՞նչ բովանդակությամբ գրքեր են տարել, տան անդամների ասելով՝ պատմական թեմաներով: Սկզբում վերցրել են նաեւ տան անդամների հեռախոսները, այնուհետ դրանք վերադարձրել են:
Կարդացեք նաև
Ըստ «Հիմնադիր խորհրդարանի» անդամների՝ այս ամենը սպասելի էր, քանի որ տառացիորեն նույնը կատարվում է Երեւանում ու այլ մարզերում:
Նունե ԱՐԵՎՇԱՏՅԱՆ
