Հիմնադիր խորհրդարանի բերման ենթարկված անդամների թիվը համալրվում է նորերով: Քիչ առաջ Վարդան Հակոբյանը լրագրողներին տեղեկացրեց, որ Երեւանից բերման է ենթարկվել ակտիվիստ Գեւորգ Սաֆարյանը, Կապանի կառույցի ղեկավարը՝ Գեւորգ Գասպարյանը եւ իրենք չեն կարողանում կապ հաստատել այլ մարզերի կառույցների ղեկավարների հետ, ինչը կասկածի տեղիք է տալիս, որ այլ բերման ենթարկվածներ էլ կան: Ըստ Վարդան Հակոբյանի, առավոտյան խուզարկություն է սկսվել նաեւ Գարեգին Չուքասզյանի ծնողների տանը, իսկ Չուքասզյանի հետ չեն կարողանում կապվել, նրանից ոչ մի տեղեկություն չունեն:
Վարդան Հակոբյանի տեղեկացմամբ՝ բոլոր բերման ենթարկվածները ոստիկանություն են տարվել քրեական գործի շրջանակներում զանգվածային անկարգություններ կազմակերպելու մեղադրանքով եւ իրենք տեղեկություն չունեն՝ արդյոք քրգործի շրջանակներում բերման ենթարկվածները ձերբակալվել են, թե ոչ: Տեղի ունեցածը Վարդան Հակոբյանին հիշեցրեց 2008թ. փետրվարի 28-ը, երբ նման քաղաքական հետապնդումներ եւ ոտնձգություններ էին սկսվել ՀԱԿ անդամների նկատմամբ: «Եթե հիշում եք՝ պատասխանը չուշացավ եւ տեղի ունեցավ մարտի 1-ը»: Իրենց դեպքում էլ Վարդան Հակոբյանը չի բացառում, որ քաղաքացիական անհնազանդություն կսկսվի եւ կտապալվեն ցեղասպանության 100-ամյա տարելիցին նվիրված միջոցառումները:
Մանրամասները՝ ավելի ուշ:
Արփինե ՍԻՄՈՆՅԱՆ
