Արցախի ժողովրդավարական կուսակցության նախընտրական ծրագրի կարեւոր կետերից մեկն է տնտեսության զարգացումը
«Լեռնային Ղարաբաղի պաշտպանության եւ ազգային անվտանգության ապահովման քաղաքականությունը շարունակելու է լինել Արցախի ժողովրդավարական կուսակցության ուշադրության կենտրոնում»,- մայիսի 3-ին Լեռնային Ղարաբաղում տեղի ունեցող խորհրդարանական ընտրություններին ընդառաջ քաղաքացիներին է հայտնում Արցախի ժողովրդավարական կուսակցությունը:
Իր նախընտրական ծրագրում կուսակցությունը խոստանում է աջակցել Պաշտպանության բանակի մարտունակության բարձրացման, մարտական և զորահավաքային պատրաստականության կատարելագործման և բանակաշինության աշխատանքներին: Նաեւ կուսակցությունը նախատեսում է պատկան մարմինների հետ սկսել ԼՂՀ «Ազգային անվտանգության հայեցակարգի» քաղաքական և մասնագիտական քննարկումների գործընթացը:
Կուսակցությունը գերակա է համարում Արցախի ժողովրդի ազատ կամարտահայտության արդյունքում ստեղծված ԼՂՀ անկախ և ինքնիշխան պետության միջազգային ճանաչումը եւ կարեւորում է ԵԱՀԿ Մինսկի խմբի հովանու ներքո ադրբեջանա-ղարաբաղյան հակամարտության խաղաղ կարգավորումն ու բանակցությունների լիարժեք ձևաչափի վերականգնումը. «Արցախի ժողովրդավարական կուսակցությունը արժեւորում է Արցախ-Հայաստան-Սփյուռք եռամիասնության գաղափարը և հետամուտ է լինելու փոխգործակցության համար նպաստավոր պայմանների ապահովմանը, համատեղ ծրագրերի իրականացմանը, ինչպես նաեւ Արցախ վերադարձող սփյուռքահայերի, այդ թվում՝ սիրիահայերի համար անհրաժեշտ պայմանների ստեղծումը: Կուսակցությունը համարում է, որ հասունացել է Հայաստանի Հանրապետության հետ Լեռնային Ղարաբաղի Հանրապետության հարաբերությունների իրավապայմանագրային կանոնակարգման պահը»:
Կարդացեք նաև
ԱԺԿ նախընտրական ծրագրի կարեւոր կետերից մեկն է տնտեսության զարգացումը: Կուսակցությունը առաջիկա տարիների տնտեսական առաջընթացի համար առանձնացրել է հրատապ լուծման կարիք ունեցող երեք հիմնական խնդիր. գյուղատնտեսության բնագավառի ճգնաժամի հաղթահարումը, բնական պաշարների խելացի և խնայողաբար օգտագործումը, ձեռներեցության ցանկությունը վարկավորելու և սուբսիդավորելու փոխարեն անցումը վերջնարդյունքի սուբսիդավորմանն ու սպառման շուկաների ապահովմանը:
Արցախի ժողովրդավարական կուսակցությունը անդրադարձ է կատարել նաեւ Լեռնային Ղարաբաղում զբոսաշրջության զարգացմանը, եւ առաջարկում է ընդլայնել հյուրանոցային ցանցերը, ներգրավել միջազգային հեղինակավոր բրենդային ցանցերին, նպաստել զբոսաշրջային գործունեությունը մայրաքաղաքից դեպի շրջաններ ապակենտրոնացմանը:
Նախընտրական ծրագրով Արցախի ժողովրդավարական կուսակցությունը խոստանում է արժանապատիվ կյանք անկախ երկրի քաղաքացիներին. «ԱԺԿ-ի համոզմամբ, դրան հասնելու հիմնական միջոցը արդյունավետ և հասցեական սոցիալական քաղաքականության իրականացումն է: Այս առումով անհրաժեշտ ենք համարում. սոցիալական ոլորտում առկա նպաստների, փոխհատուցումների, թոշակների և այլ վճարների գույքագրման անցկացումը, ինչը իրական հիմքեր կտա նաև գնահատելու սոցիալական քաղաքականության արդյունավետությունը, դրա հասցեականությունը, նպաստների, կենսաթոշակների, թոշակների, զանազան լրավճարների ու փոխհատուցումների վերանայումը՝ այն դարձնելով ավելի ճկուն և պարզ»:
Ամի ՉԻՉԱԿՅԱՆ
