«Եթե հարկայինը ստուգում է, բոլորին է ստուգում, ի՞նչ յուրային, ի՞նչ ոչ յուրային: Բոլորին էլ ստուգում է»,- Aravot.am-ի հետ զրույցում ՀՀԿ պատգամավոր Համլետ Հարությունյանն այսպես պատասխանեց մեր հարցին՝ ինչո՞ւ են իշխանությունները ստուգումներ անում հենց Հակոբ Հակոբյանի, Աշոտ Աղաբաբյանի եւ Գարեգին Նուշիկյանի ընկերություններում, նրանք այլեւս յուրային չե՞ն համարվում:
Հիշեցնենք, որ իշխանությունները սկսել են հարկային ստուգումներ անցկացնել եւ նույնիսկ տուգանքներ կիրառել ՀՀԿ-ականների ընկերություններում: Մասնավորապես, խոսքը Հակոբ Հակոբյանի, Աշոտ Աղաբաբյանի, Գարեգին Նուշիկյանի մասին է:
Համլետ Հարությունյանի խոսքերով՝ «Ես ընդհանրապես չգիտեմ ում են ստուգում, ինչ են ստուգում, ինձ այնքան անհետաքրքիր են այդ ստուգումները, այդ միլիարդատերերը, այդ միլիոնատերերը: Թող գնան ստուգեն, ում ուզում են՝ տուգանեն»:
Հռիփսիմե ՋԵԲԵՋՅԱՆ
