Գյուղատնտեսության նախարարության սննդամթերքի անվտանգության պետական ծառայության պետ Արմեն Հայրապետյանի հանձնարարականի համաձայն՝ ապրիլի 1-ից Թուրքիայից եւ Պակիստանից Հայաստան ներմուծվող պտուղ-բանջարեղենը պետք է ենթարկվի լաբորատոր հետազոտության։
Ընդ որում՝ Թուրքիայից եւ Պակիստանից ներմուծվող թարմ եւ թարմ սառեցված մրգերը եւ բանջարաբոստանային կուլտուրաները բացի բուսասանիտարական հսկողությունից կենթարկվեն նաեւ թունավոր տարրերի, նիտրատների եւ պեստիցիդների նկատմամբ լաբորատոր փորձաքննության եւ այդ թունավոր նյութերի առկայության դեպքում այդ մթերքների ներկրումը կարգելվի:
Զարմանալի է, որ դրսից, առավել եւս Թուրքիայից ու Պակիստանից ներկրվող մթերքների նկատմամբ մինչ օրս համապատասխան սանիտարահամաճարակային վերահսկողություն չի իրականացվել Հայաստանում։ Ըստ էության, օգտվելով թուրքական բարիքներից, հայ սպառողներն անգամ երաշխավորված չեն եղել, որ լիովին անվտանգ պտուղ-բանջարեղեն են օգտագործում:
Դա այն դեպքում, երբ Պակիստանից եւ առավելապես Թուրքիայից մեծ թվով պտուղ-բանջարեղեն է ներմուծվում Հայաստան: Թուրքիայից ներմուծվում է լոլիկ, վարունգ, կիտրոն, թուրինջ, նարինջ, նուռ, մանդարին, Պակիստանից՝ մանդարին, կիվի եւ այլն:
Կարդացեք նաև
Ինչո՞վ է պայմանավորված սննդամթերքի անվտանգության պետական ծառայության ուշացած որոշումը: Ծառայության մամուլի քարտուղար Նվարդ Առաքելյանի տեղեկացմամբ, սննդամթերքի անվտանգության պետական ծառայությունը ռիսկային երկրներից ներկրվող պտուղ-բանջարեղենի նկատմամբ հսկողություն մշտապես է իրականացնում սահմանային ստուգումների ընթացակարգով: Մասնավորապես ներմուծվող պտուղ-բանջարեղենը ենթարկվում է բուսասանիտարական լաբորատոր հետազոտության: Որից հետո միայն, շեղումներ չլինելու դեպքում է թույլատրվում սննդամթերքի մուտքը հանրապետություն: Իսկ ծառայության պետի նոր որոշումը պայմանավորված է այդ պտուղ-բանջարեղենի նկատմամբ անվտանգության հսկողության ուժեղացմամբ:
Հոդվածն ամբողջությամբ կարող եք կարդալ «Հայոց աշխարհ» թերթի այսօրվա համարում
