ԼՂՀ կոմունիստական կուսակցության նախընտրական ծրագրում սոցիալիզմ, արդարություն, աշխատանք, ամեն ինչ ժողովրդի համար, ժողովրդի հետ գաղափարախոսություններն են: Կոմունիստական կուսակցության նախընտրական խոստումներից է սոցիալական արդարության, խորհրդային կրթական համակարգը, մշակույթի վերականգնումը:
«Այնպես պետք է անենք, որ Արեւմուտքը մեզնից մշակույթ սովորի, մենք դարավոր մշակույթ ունենք: Ամեն տարի Արեւմուտքը ցեղասպանության հարցն է խփում, թե ճանաչելու ենք, Ամերիկայի յուրաքանչյուր նախագահ նախընտրական խոստում է տալիս՝ կընդունեմ, բայց նրանք ոչ Ղարաբաղի հարցը կլուծեն, ոչ էլ ցեղասպանությունը կճանաչեն»,- Aravot.am-ին ասաց կոմկուսի գլխավոր քարտուղար Հրանտ Մելքումյանը:
Հիշեցնենք, որ Ղարաբաղում մայիսի երեքին խորհրդարանական ընտրություններ են նշանակված:
Անդրադառնալով քննադատությանը, թե Արցախում ընդդիմություն չկա, պառակտված են, Հրանտ Մելքումյանը շարունակեց. «Ղարաբաղը Հայաստանի նման չէ, մեր գյուղերում են թնդանոթները դրված, եթե այստեղ խրտնեցինք, թուրքերը ոտքի տակ են տալու: Պայմանավորվել ենք իրար «պադնոշկա» չտանք»:
Կարդացեք նաև
Հետո ասաց, որ թե Արցախում, թե Հայաստանում միայն երկու կուսակցություն կա՝ կոմունիստականը ու Դաշնակցությունը. «Մնացածը խմբավորումներ են, կուսակցություններ չկան: ԲՀԿ-ի օրինակը ձեզ ապացույց, հենց քաղաքական առաջնորդը մի կողմ է քաշվում, կուսակցությունը փլուզվում է»:
Նրա խոսքով, ով խոսում է Արցախում ընդդիմության բացակայության մասին, ոչ մի բան էլ չի հասկանում. «Ընդդիմություն կա, բայց ընդդիմության գործունեությունը ոչ թե հայհոյանքի, այլ գաղափարախոսության հիման վրա է: Ոչ թե խնդիր ունենք իրար հետ խոսելու, այլ ամեն մեկն իր թեզն է առաջ տանում: Մենք կռվող պետություն ենք, եթե իրարից բաժանվենք, մեզ առանձին-առանձին կուտեն, այդքանը հասկանում ենք՝ թե ընդդիմություն, թե իշխանություն»:
Արփինե ՍԻՄՈՆՅԱՆ
