Այսօր ԱԺ արտաքին հարաբերությունների հանձնաժողովում «Ժառանգության» պատգամավոր Զարուհի Փոստանջյանը հայտարարության նախագիծ ներկայացրեց «Հայոց ցեղասպանության 100-րդ տարելիցի համահայկական հռչակագրի ընդունման մասին»: Նախագիծը տառացիորեն նույն համահայկական հռչակագիրն է, որն ընդունվել է հունվարի 20-ին:
Ալեքսանդր Արզումանյանը հեգնեց. «Ինչի՞ Չարենցի «Մահվան տեսիլը» չեք բերում՝ որպես հայտարարության տեքստ: Ո՞նց եք ուրիշի գրվածը հայտարարություն բերում: Ամեն շաբաթ մեկը մի տեքստ կբերի, մեկը կասի՝ ինձ դուր է գալիս Վանո Սիրադեղյանի պատմվածքը եւ կբերի հանձնաժողով, սա նախադեպ կլինի»:
Զարուհի Փոստանջյանն էլ ասաց, որ Ցեղասպանության 100-րդ տարելիցն է եւ մենք չունենք նման հռչակագիր, որն անցել է ԱԺ-ով. «Միացյալ Հայստանի փաստաթուղթ կա, որը մենք շուրջ 100 տարի առաջ ենք ունեցել: Սա համայն հայության կողմից ընդունված եզակի փաստաթուղթ է, ընդունել ենք պետականություն եւ պետական մարմնի՝ ԱԺ-ի կողմից եւս պետք է ընդունենք այս հռչակագիրը: Սա է հիմքը: Եթե բերում եք ինչ-որ զուգահեռներ եք փորձում անցկացնել, ես փաստաթղթերին վերաբերում եմ լրջորեն եւ գտնում եմ, որ փաստաթղթերը պետք է ընդունվեն պետական մարմնի կողմից»:
Ալեքսանդր Արզումանյանը խոստացավ հիմնավորել, թե ինչու է ինքը զարմացած եւ ինչու է դեմ դրան. «Փորձ է արվել միասնական տեսակետ ձեւավորել, որն ընդունել է մեր, համայն արցախահայության, Սփյուռքի հայության կողմից: Բերելով ԱԺ, դուք դա փոքրացնում եք եւ բերում եք արտաքին քաղաքականության դոկտրինի փոփոխություն, ինչը վտանգավոր է»:
Կարդացեք նաև
Զարուհի Փոստանջյանի խոսքերով՝ «Այո, ժամանակը եկել է, որ արտաքին քաղաքականության դոկտրինը փոխվի: Ոչ թե ՀՀՇ-ական նախկինում ընդունված դոկտրինը, որը ազգային շահը չէր հետապնդում: Սա պետք է հիմք հանդիսանար մեր արտաքին քաղաքականության փոփոխության համար»:
Ալեքսանդր Արզումանյանը բարկացավ. «Պետք է նկատողություն անել, որպեսզի այլեւս թույլ չտան ձեզ որեւէ կուսակցության մասին ասել հակապետական, որեւէ մեկը քաղաքական ուժերից մյուսին չեն վիրավորում, խնդրում եմ մնաք դիվանագիտական պրոտոկոլի մեջ»:
Հռիփսիմե ՋԵԲԵՋՅԱՆ
