Երեկ Իրանի արտգործնախարար Մուհամմադ Ջաֆար Զարիֆը «Թվիթերում» գրառում է արել այն մասին, որ շվեյցարական Լոզանում Իրանի և «վեցյակի» միջև իրանական միջուկային ծրագրի բանակցությունը հաջողությամբ է ավարտվել, և կողմերը կարող են ձեռնամուխ լինել պայմանագրի կնքմանը: Բանակցության ընթացքում պայմանավորվածություն է ձեռք բերվել, որ Թեհրանը երկու-երրորդով կկրճատի ուրանի հարստացումը, իսկ միջուկային ծրագիրը կլինի տասնամյա դիտարկման տակ:
Եվրամիության արտաքին հարցերի և անվտանգության հանձնակատար Ֆեդերիկա Մոգերինին հայտարարել է, որ բանակցության արդյունքը պետք է արժանանա ՄԱԿ-ի Անվտանգության խորհրդի հավանությանը, որից հետո Իրանի վրայից փուլ առ փուլ կհանվեն պատժամիջոցները: ԱՄՆ նախագահ Բարաք Օբաման ևս հայտարարել է պատժամիջոցները քայլ առ քայլ հանելու մասին` կախված, իհարկե, բանակցության պայմանավորվածությունների կատարման ընթացքից: Օբաման նշել է, սակայն, որ մարդու իրավունքների խախտման կապակցությամբ պատժամիջոցներին դա չի վերաբերում:
Այսպիսով` Իրանի հարցում, ըստ էության, ձեռք է բերվել, կարելի է առանց վարանելու ասել, պատմական համաձայնություն: Իհարկե, այն դեռ իր տրամաբանական ավարտին, այսինքն` իրականացման ընթացքին չի հասել, սակայն եղածն արդեն իսկ վկայում է միջազգային քաղաքականության ասպարեզում շեշտակի փոփոխությունների մասին: Եվ այս փոփոխություններն առաջիններից մեկը կարող են անդրադառնալ, և իհարկե` համաձայնության իրականացման մեկնարկի պայմաններում անպայման կանդրադառնան, մեր տարածաշրջանի և հատկապես Հայաստանի վրա: Եվ այս առումով մենք սա ասում ենք միանգամայն դրական արձագանքով և սպասումներով:
Մուսա Միքայելյան
Կարդացեք նաև
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
