Ապրիլի 2-ին նաև Քաշաթաղի շրջանի հանրակրթական դպրոցները մասնակցեցին «Կենգուրու» միջազգային մաթեմատիկական մրցույթին: Շրջկենտրոն Բերձորի Վ. Թեքեյանի անվ. թիվ 1 միջն. դպրոցում մրցույթին մասնակցեցին նաև Արտաշավիի, Մովսեսաշենի, Վակունիսի, Ղազարապատի, Քարեգահի և Բերձորի Վահան Զատիկյանի անվ թիվ 2 դպրոցների ընդհանուր 58 աշակերտ՝ 3-11-րդ դասարաններից: Աշակերտները հիմնականում տարրական՝ 3-4-րդ(17 հոգի) և միջին օղակից էին: Ամենաշատը 5-6-րդ դասարանցիներ էին՝ 24 հոգի:
Ցավալի է, որ բարձր դասարաններից քիչ մասնակիցներ կային: 11-րդից ընդամենը 1 աշակերտ՝ Մարատ Մարտիրոսյանը, Քարեգահի միջնակարգ դպրոցից մասնակցեց մրցույթին: 9-րդ դասարանից երեք հոգի էին՝ Մատինյան Տիգրան՝ թիվ 2, Սասուն Կիրակոսյանն ու Արտաշես Ավետյանը՝ Արտաշավիի Լ. Ազգալդյանի անվան միջնակարգ դպրոցներից:
Շրջվարչակազմի աշխատակազմի կրթության բաժնի ներկայացուցիչն ու Բերձորի թիվ 1 միջնակարգի տնօրեն Անահիտ Քոսակյանը աշակերտներին բացատրեցին մասնակցության կանոնները: 3-րդ դասարանի աշակերտուհի Նելլի Գրիգորյանը (թիվ 1 դպրոց) բացեց հարցաշարերի ծրարը: Աշակերտներին տրված էր 75 րոպե ժամանակ, որի ընթացքում պետք է պատասխանեին մաթեմատիկական հետաքրքիր հարցերին ու լուծեին խնդիրները: Երկրորդ կենտրոնը գործում էր շրջանի հարավային Իշխանաձոր գյուղի Հովհ. Թումանյանի անվ. միջնակարգ դպրոցում:
Կրթության բաժնի առաջատար մասնագետ, մրցույթի կազմակերպիչ Սիրվարդ Թամազյանը հեռախոսով տեղեկացրեց, որ այստեղ մասնակցել են 3-12-րդ դասարաններից մոտ 100 աշակերտ՝ Հայկազյանի, Կումայրիի, Կերենի, Ծաղկաբերդի, Սարատակի և այլ ընդհանուր 16 դպրոցներից:
Ներկա էր նաև ԼՂՀ ԿԳՆ ներկայացուցիչ Մուրադ Շահրամանյանը: Հեռախոսով զրուցեցի նաև ԼՂՀ ԿԳ փոխնախարար Միքայել Համբարձումյանի հետ. տեղեկացրեց, որ հանրապետությունում ընդհանուր 30 կենտրոններում մոտ 2000 աշակերտ են մասնակցել մրցույթին, որի արդյունքները կամփոփվեն մայիսի առաջին կեսին, մրցանակաբաշխությունը՝ երկրորդ կեսին:
Զոհրաբ Ըռքոյան
